چی لەبارەی دۆخی مەینوو لە مانچێستەر یونایتد دەزانین؟

یاریگا –

بایرن میونشن نایەوێت دەرفەتی گواستنەوەی ئەستێرەیەکی لاوی ئینگلیزی لەدەستبدات.

کۆبی مەینوو، ئەستێرەی لاوی مان یونایتد یەکێکە لەو یاریزانانەی باس لە چوونە دەرەوەیان لە ئۆڵدترافۆرد دەکرێت و ناوی بە چەند یانەیەک بەستراوەتەوە.

مانچێستەر یونایتد دەمێکە گفتوگۆکانی نوێکردنەوەی گرێبەستەکەی لەگەڵ مەینوو دەستپێکردووە کە بڕیارە لە هاوینی ساڵی 2027 بەسەربچێت، بەڵام تاوەکو ئێستا هیچ پەرەسەندنێک لە گفتوگۆکان نییە.

پێگەی پیپڵس پێرسن بڵاویکردووەتەوە، مەینوو بە هەواڵەکانی مان یونایتد بۆ نوێکردنەوەی گرێبەستەکەی نیگەرانە، بۆیە باس لە بژاردەکان دەکرێت.

چێڵسی یەکێکە لەو یانانەی بە توندی بۆ گواستنەوەی مەینوو هاتووەتە سەرهێڵ و ئامادەیە مووچەی هەفتانەی بۆ 200 هەزار پاوەند بەرزبکاتەوە.

رۆژنامەی سەن روونیکردووەتەوە، بایرن میونشن لە نزیکەوە چاودێری دۆخی مەینوو دەکات و نووسیویەتی

ئەگەر مانچێستەر یونایتد داواکانی مەینوو جێبەجێ نەکات، ئەوا ئیتر یاریزانەکە دوا وەرزی دەبێت لە ئۆڵدترافۆرد.

چێڵسی لە سەرووی گرنگیپێدەرانە، بەڵام ئێستا میونشنیش هاتووەتە سەرهێڵ و دەمێکە بەو یاریزانە سەرسامن. مەینوو خاوەن یەکێکە لە کەمترین مووچەکانی مان یونایتدە و رابن ئامۆریم باش لە گرنگی یاریزانەکە تێدەگات.

رێساکانی قازانج و بەردەوامی کێشەی زۆری بۆ مانچێستەر یونایتد دروستکردووە، بۆیە نایەوێت پەلە لە هەنگاوەکاندا بکات.