یاریگا –
جود بێڵینگهام سەرکەوتنەکانی نێو یاریگای دەباتە دەرەوە و لە بواری بزنس و کاردا پرۆژەی نوێی دەبێت.
ئەستێرە ئینگلیزیەکە کە تازە تەمەنی 21 ساڵە، لەوەتەی پەیوەندیکردنی بە ریاڵ مەدریدەوە بە ماوەیەکی کەم توانی نێوبانگی خۆی زیاتربکات بەو ئاستەی هەر لە یەکەم وەرزی لەگەڵ شاهانەکان پێشکەشی کرد و نازناوە گرنگەکانی چنیەوە.
بەگوێرەی زانیارییەکانی رۆژنامەی میرەری ئینگلیزی، جود سەرقاڵی تۆمارکردنی ناوی براندێکی بازرگانی تایبەت بەخۆیەتی لەژێر ناونیشانی “JB”.
ئەو سەرچاوەیە زانیویەتی کە لۆگۆی “JB” دەخرێتەسەر بەرهەمە جیاوازەکانی وەک پێداویستیەکانی پەڕاوگە، فڵچەی ددان، بەرگی سەرین، سندوق و قوتووی چا، تەنانەت پۆشاکی ئاژەڵانیش.
لەگەڵ زیاتر درەوشانەوەی ئاستەکەی لەسەر لاکێشەی سەوز، بێڵینگهام لەلایەکیترەوە سەرقاڵی پەرەپێدانە بە کاری بازرگانی و، هەر لەو چوارچێوەشدا ساڵی رابردوو وەک روخسارێکی دیار لەپاڵ کارە بازرگانییەکانی کیم کارداشیانی نمایشکاری پۆشکادا دەرکەوت.
ئەوە و هەروەها خاوەنی هەردوو کۆمپانیای JB5 و Bello&Belloیـە کە ئەوەی دواتریان بە هاوکاری باوک و دایکی دایانمەزراندووە بۆ بواری پێشکەشکردن و خزمەتگوزاریی مێدیای. پێگەی Goalی وەرزشی زانیویەتی کە بەهای کۆمپانیاکە خۆی دەدا لە 2.6 ملیۆن پاوەند.
