یاریگا –
فلیک پێش رووبەڕووبوونەوەی ریال مەدرید لە یاریی کۆتایی جامی سوپەری ئیسپانیا لەبارەی پشتبەستن بە تەڵەی ئۆفساید لە یاریی کلاسیکۆ دەڵێت ‘شێواز و پلانی خۆمان ناگۆڕین’.
هانزی فلیک راهێنەری بارسێلۆنا لە کۆنگرەی رۆژنامەوانی پێش یاریی کلاسیکۆ لەبارەی یاریی سبەی دەڵێت :’رووبەرووی یەكێک لە باشترین تیمەكانی جیهان دەبینەوە، دەبێت 90 خولەكی زۆر باش یاریی بكەین، ئێمە بیر لە یاریی کلاسیکۆی رابردوو ناکەینەوە و نامانەوێت بەراوردی یارییەکەی سبەی بکەین، ئەوەی گرنگە سبەی هەموو هەوڵێک بدەین باشترین یاریی خۆمان پێشکەش بکەین’.
هەروەها دەشڵێت :’ئێمە لە سانتیاگۆ بێرنابیۆ چۆن یارییمان کرد، بەدڵنیاییەوە بە هەمان شێواز و پلان بەردەوام دەبین و شێواز و پلانی خۆمان ناگۆڕین، وابزانم لە یاریی کلاسیکۆی رابردوو هەر بەو شێوازەی ئێستامان یارییمان کرد’.
لە یاریی کلاسیکۆی رابردوو لەم وەرزەی لالیگا کە لە یاریگای سانتیاگۆ بێرنابیۆ بەڕێوەچوو، 12 ئۆفساید لەسەر ریال مەدرید هەژمارکرا، کە بارسێلۆنا لەناو مەدرید 4-0 لە ریال مەدریدی بردەوە.
راهێنەرەکەی بارسێلۆنا لەبارەی ئامادەبوونی رۆناڵد ئاراوخۆ و دانی ئۆلمۆ بۆ یارییەکەی سبەی دەڵێت :’دانی ئۆلمۆ تەواو ئامادەیە و دەتوانێت یاریی بکات، ئەو هیچ کێشەیەکی نییە و لە رووی هزرییەوە تەواو ئامادەیە، من نامەوێت لەبارەی داهاتووی ئاراوخۆ هیچ بڵێم، گرنگترین شت ئەوەیە بۆ یارییەکەی سبەی ئامادەیە، ئەو لە پێکانەکەی گەڕاوەتەوە و ئێستا لە رووی توانای جەستەییەوە تەواو ئامادەیە’.
فلیک دەشڵێت :’جامی سوپەر لەگەڵ لالیگا جیاوازە، بۆیە ئاساییە ڤینیسیوس جونیۆر سەرەڕای سزادرانەکەی لە لالیگا، لە جامی سوپەری ئیسپانیا یاریی دەکات، ئەمە بڕیاری من نییە، ئێمە گرنگی بەوە نادەین ئەگەر ریال مەدرید سبەی بباتەوە ژمارەی نازناوەکانمان لە مێژووی جامی سوپەری ئیسپانیا هاوتا دەکاتەوە، ئەوە گرنگ نییە، گرنگ ئەوەیە سبەی ببەینەوە و دڵی هاندەرانمان خۆش بکەین’.
سبەی یەکشەممە کاتژمێر 22:00 ریال مەدرید و بارسێلۆنا لە یاریی کۆتایی جامی سوپەری ئیسپانیا لە سعوودیە بەیەک دەگەن، کە ساڵی رابردوو ریال مەدرید لە یاریی کۆتایی 4-1 لە بارسێلۆنای بردەوە و جامی سوپەری بەدەستهێنا.
