چێڵسی یاریزانێکی پێشووی خۆی بە پارەیەکی خەیاڵی دەگوازێتەوە

یاریگا –

چێڵسی دەیەوێت جارێکی دیکە گرێبەست لەگەڵ مارک گێی، بەرگریکاری کریستال پاڵاس واژۆ بکات.

تۆڕی هەواڵی سکای سپۆرتس بڵاویکردووەتەوە، گێی تەمەن 24 ساڵ، بووەتە ئامانجی چێڵسی، هەرچەندە لە هاوینی ساڵی 2021 بەبڕی 18 ملیۆن پاوەند بە کریستال پاڵاس فرۆشرا.

تاوەکو ئێستا چێڵسی بە فەرمی ئۆفەری پێشکەشی پاڵاس نەکردووە، بەڵام نوێنەری یاریزانە ئینگلیزییەکە ئاگاداری گرنگییەکانی بلووزە.

تەنیا 18 مانگ بۆ بەسەرچوونی گرێبەستە پێنج ساڵییەکەی گێی لە یانەکەی باشووری لەندەن ماوە.

چێڵسی کێشەی لە هێڵی بەرگریدا هەیە و ئێنزۆ مارێسکا، راهێنەری بلووز دەیەوێت لە مێرکاتۆی ئەم زستانەدا کێشەکان چارەسەر بکات.

هەریەکە لە وێسلی فۆفانا و بێنۆیت بادیاشیڵ بەهۆی پێکان لە یاریگاکان دابڕاون، تەنانەت پێشبینی تەواوبوونی ئەم وەرزە بۆ فۆفانا دەکرێت.

گێی تەنیا دوو یاریی فەرمی لەگەڵ چێڵسی کردووە، بەر لە گواستنەوەی بۆ پاڵاس، بە خواستن یاریی بۆ سوانزی سیتی کرد.

لە هاوینی رابردوودا، نیوکاسڵ یونایتد ئۆفەرێکی بەبڕی 65 ملیۆن پاوەند بۆ گواستنەوەی گێی پێشکەشی کریستال پاڵاس کرد، بەڵام ئۆفەرەکەی رەتکرایەوە.