ئەمڕۆ دوایین دەرفەتە؛ تاوەکو ئێستا بارسێلۆنا نەیتوانیوە ناوی دانی ئۆلمۆ تۆمار بکات
یاریگا –
ئەمڕۆ دوایین دەرفەتە بۆ ئەویە بارسێلۆنا ناوی دانی ئۆلمۆ لە لالیگا تۆمار بکات، کەچی تاوەکو ئێستا (کاتژمێر 12:00ـی نیوەڕۆ بە کاتی ئیسپانیا) یانە کەتەلۆنییەکە لە هەوڵەکانی شکستیهێناوە.
رۆژنامەی موندۆ دیپۆرتیڤۆی کەتەلۆنی ئاشکرایکردووە، تاوەکو کاتژمێر 12:00ـی نیوەڕۆی ئەمڕۆ سێشەممە (31ـی دیسەمبەری 2024) بارسێلۆنا نەیتوانیوە ناوی دانی ئۆلمۆ تۆمار بکات، بلاوگرانا لە هەوڵەکانی شکستیهێناوە لەکاتێکدا تەنیا 12 کاتژمێر دەرفەت لە بەردەم بارسا ماوە بۆ ئەوەی ناوی یاریزانە ئیسپانییەکە بۆ قۆناخی دووەمی لالیگا تۆمار بکات.
رۆژنامە کەتەلۆنییەکە ئاشکرایکردووە، ئۆلمۆ لە دڵەڕاوکێدایە و لەبارەی داهاتووی خۆی هەست بە دوودڵی دەکات، بۆیە خۆی شاردووەتەوە و تەنانەت لە دووری ماڵەکەی ئاهەنگەکانی سەری ساڵ بەڕێ دەکات، لە ئەمریکا چاوەڕێی ئەوە دەکات دوای تەواوبوونی پشووەکەی کاتێک گەڕایەوە راهێنانەکانی بارسێلۆنا ناوی تۆمار کرابێت.
🕵️ 𝐓𝐎𝐏 𝐒𝐄𝐂𝐑𝐄𝐓 𝐌𝐃 Dani Olmo y el Barça: nervios y desgaste al límite de su inscripción
✍️ @martinezferran https://t.co/IcGtaaEgXz
— Mundo Deportivo (@mundodeportivo) December 31, 2024
بارسێلۆنا تاوەکو ئێستا لە دوو هەوڵی بۆ تۆمارکردنی ناوی ئۆلمۆ شکستیهێناوە، کە بەهۆیب یاسای دارایی خاوێنی لالیگا دەبێت هاوسەنگی لە نێوان داهات و خەرجییەکانی یانەکان هەبێت.
بارسێلۆنا لە بازاڕی گواستنەوەی هاوینە بەرامبەر 50 ملیۆن یۆرۆ یاریزانە ئیسپانییەکەی لە لایپزیگەوە گواستەوە ریزەکانی، گەرچی سەرەتا نەیتوانی ناوی ئۆلمۆ تۆمار بکات، بەڵام دوای ئەوەی ئاندریاس کریستیێنسن تووشی پێکان بوو، بارسا توانی تاوەکو رۆژی 31ـی دیسەمبەر ناوی ئەو یاریزانە تۆمار بکات.
ئەگەر بارسێلۆنا تاوەکو کاتژمیر 12:00ـی ئەمشەو بە کاتی ئیسپانیا (02:00ـی شەو بە کاتی کوردستان) نەتوانێت ناوی ئۆلمۆ تۆمار بکات، ئەوا لە سبەیەوە ئۆلمۆ دەبێتە یاریزانێکی ئازاد و دەتوانێت بە گرێبەستی ئازاد بچێتە هەر یانەیەکی دیکە.
