هەواڵێکی ناخۆش بۆ هاندەرانی مانچێستەر یونایتد

یاریگا –

دەستەی کارگێڕی مانچێستەر یونایتد بڕیاریداوە، هیچ بوودجەیەک بۆ گواستنەوەکانی مێرکاتۆی زستانە تەرخان ناکات.

رۆژنامەی مانچێستەر ئیڤینینگ نیوز بڵاویکردووەتەوە، لە دوای خەرجکردنی 200 ملیۆن پاوەند لە گواستنەوەکانی هاوینەی رابردوودا، یانەکە ئامادەنییە هیچ بڕە پارەیەک لە مانگی داهاتوودا خەرج بکات.

لە هاوینی رابردوودا یونایتد لەسەر داوای ئێریک تێن هاخ، هەریەکە لە ماتیس دی لیخت، نوسەیڕ مەزراوی، جۆشوا زیرکزی، مانوێل ئوگارێ و لێنی یۆرۆی گواستەوە.

مانچێستەر یونایتد سەرەڕای گۆڕانکاری گەورە لە پێکهاتەکەیدا، کەچی ئاستێکی خراپ لەم وەرزەدا پێشکەش دەکات و ئێستا لە پلەکانی دواوەی ریزبەندی پرێمەرلیگدایە.

بەگوێرەی زانیارییەکانی رۆژنامەکە بێت، پێویستە مانچێستەر یونایتد سیاسەتی فرۆشتن بۆ کڕین پەیڕەو بکات، لە بەرامبەر گواستنەوەی هەر یاریزانێک، دەبێ دەستبەرداری یاریزانێکی دیکە ببێت.

روبن ئامۆریم، راهێنەری مان یونایتد لە پرێس کۆنفڕانسی دوای دۆڕانی یاریی دوێنێ شەوییان بەرامبەر نیوکاسڵ یونایتد روونیکردەوە، هیچ ئەگەرێک بۆ گواستنەوەی یاریزانان نییە.

مانچێستەر یونایتد بەکۆکردنەوەی 22 خاڵ لە پلەی 14ی ریزبەندی پرێمەرلیگدا و تاوەکو ئێستا 9 یاریی دۆڕاندووە.