یاریگا –
بە بڕیاری تیاگۆ مۆتای راهێنەری یوڤێنتوس یاریزانێکی ئەو یانەیە بەیەکجاریی لە پلانەکاندا نابێت و بۆ گەشتەکەی سعودیەش دووردەخرێتەوە.
هەینی داهاتوو خانمە پیرەکە لەسەر خاکی سعودیە لە یەکەم یاریی گەڕانەوەیان لەدوای پشووەکانی سەری ساڵ، لە میانی یاری پێش کۆتایی جامی ئیتاڵیا رووبەڕووی ئەیسی میلان دەبنەوە و تیاگۆ مۆتا بڕیاری لە پێکهاتەکەی داوە.
بەگوێرەی زانیارییەکانی فابریزۆ رۆمانۆ، بۆ ئەو جامە دانیلۆی بەڕازیلی بەتەواوەتی دوورخراوەتەوە و گەشتی وڵاتەکەی کەنداو ناکات. ئەوەش واتا بەرگریکارەکە چیتر لە پلانی راهێنەرە ئیتاڵییەکەدا نابێت بۆ یارییەکانی داهاتوو.
رۆمانۆ نووسیوشیەتی کە دانیلۆ لە بازاڕەکانی زستانەدا بەردەستە هەر یانەیەک خواستی لە گواستنەوەی هەبێت.
پێگەی Football Italia زانیویەتی کە یانەی ناپۆلی خواستی لە گواستنەوەی یاریزانە 33 ساڵانەکە هەیە. دەتوانن بەبێ بەرامبەر یاریزانێکی بە ئەزموونی وەک دانیلۆ کە پێشتر یاریی بۆ یانەکانی وەک ریاڵ مەدرید و مانچێستەر سیتی کردووە، بگوازنەوە ریزەکانیان.
دانیلۆ لەوەتەی 2019 درێسی یۆڤی پۆشیوە، لەم وەرزە لە بژاردە سەرەکییەکانی مۆتا نەبوو. بەجۆرێک لە 12 یاریی خولی ئیتاڵی تەنها 578 خولەک یاری کردووە و لە چامپیۆنزلیگیش لە 4 یاریدا 231 خولەک.
