یاریگا –
لە دوایین یاریی دواخراوی خۆیاندا، نەورۆز لە یاریگای خۆی سەرکەوتنەکانی دهۆکی راگرت و بە ئەنجامێکی گەورە لێی بردەوە.
لە یارییەکی دواخراوی گەڕی هەشتەمی خولی ئەستێرەکانی عێراق، نەورۆز لە یاریگای خۆی میوانداری دهۆکی کردوو یارییەکەشی بە ئەنجامی 3 _ 1 گۆڵ لێ بردەوە، دوای سێ سەرکەوتنی لە سەر یەک دهۆک تووشی شکست هات سەرەڕای ئەوەی زیاتر لە چوار یاریزانی سەرەکی بە هۆی پێکان و هۆکاری جیاوە یارییان نەکرد.
مەسعود میڕال دەربارەی شکستەکەیان و ئامادەکاری تیپەکەی بۆ یارییەکە رایگەیاند:
ئەمە یاریی یەکەم نیە ئێمە گۆڵمان لێدەکرێت، لەم یارییە تووشی بارودۆخێکی ناخۆش هاتین، مەشقەکانی چەند رۆژی رابردوومان بۆ یارییەکە باش نەبوو بەواتای ئەوەی بە تەواوی بۆ یارییەکە ئامادە نەبووین، لە ماوەی مەشقەکانی داهاتوو قسە لەگەڵ یاریزانەکانم دەکەم و دەبێت پێداچوونەوە بۆ دەروونی خۆیان بکەن تاوەکو جارێکی تر بگەرێینەوە سەرکەوتن.
قەحتان جەسیر راهێنەری نەورۆز کە لە کۆنگرە رۆژنامەوانیەکە ئامادەبوو دەربارەی سەرکەوتنەکەیان گوتی:
سەرەتا کە تیپەکەمان وەرگرت کارمان لە سەر رۆحیەتی یاریزانەکان کرد دواتر شێوازی یاریکردنمان پێدان، ئەمڕۆ رێکخستنی یاریزانەکانمان زۆرباش بوو وە بە سێ هێرشبەر یارییمان کرد، ئەو رووداوانەی ئەمڕۆش روویاندا کارێکی ئاسایی یە لە یاریی دێڕبی.
بەم سەرکەوتنە نەورۆز کۆی خاڵەکانی بووە 11 خاڵ و هاتە ریزبەندی 17ـەمی خولەکە و گەڕی داهاتووش لە یاریگای خۆی بەرامبەر دیالا یاریی دەکات.
وێڕای شکستەکەیان دهۆک بە 15 خاڵ لە ریزبەندی 10ـەیەمی خولی ئەستێرەکانی عێراق مایەوە، گەڕی داهاتووش هەڵۆکانی چیا لە یاریگای خۆیان بەرامبەر نەفتی بەسرە یاریی دەکەن.
