یاریگا –
هاری کەین توانیویەتی لە دەرەوەی یارگاش کار لەسەر کۆکردنەوەی داهات بکات و بەشێوەیەکی بەرچاو سامانەکەی زیادبکات.
بەپێی بڵاوکراوەیەکی نوێی رۆژنامەی سەندەی تایمی ئینگلیزی کە لیستی وەرزشوانە ساماندارەکانی ئاشکراکردوو، دەردەکەوێ هێرشبەرەکەی ئێستای بایرن میونشن بازێکی زۆری داوە لەچاو کۆتا راپۆرتی سەرەتای ئەم ساڵ.
بەگوێرەی زانیارییەکانی ئەو سەرچاوەیە، هاری کەین لە سەرەتای ئەم ساڵدا بە هەبوونی 75 ملیۆن پاوەندی پوخت، ریزبەندی 35ـەمین کەسایەتی بواری وەرزشی گرتبوو.
لە وردەکاریی راپۆرتی ئەو رۆژنامەدا سەرچاوەکانی داهاتی کاپتنەکەی ئینگلتەرا باسکراوە. بەجۆرێک بڕی 10.8 ملیۆن پاوەندی دیکەی لە گرێبەستەکانی سپۆنسەرکردنی مافی وێنە لەگەڵ کۆمپانیاکانی خانووبەرە، کە لە مانگی دیسەمبەری ساڵی رابردوو واژۆیکردبوو، زیادکردووە بۆ سەر کۆی سامانەکەی.
ئەوە و هەروەها بڕی 3.6 ملیۆن پاوەندیشی وەک مووجە لە بایرن میونشن وەرگرتووە. لەکاتێکدا بەهای کۆمپانیا تایبەتەکەشی بۆ بواری خانووبەرە لە 2 ملیۆن پاوەندەوە زیادکردووە بۆ 15 ملیۆن.
جیا لەوانە، بڕێکی باشیشی لە کۆمپانیاکانی وەک نایکی و مارس دەستکەوتووە. رێکخراوێکیشی هەیە بەناوی HK28 LTD کە سەرپەرشتی کارە وەرزشیی، بازرگانیی و خێرخوازییەکانی ناوبراو دەکات.
وەک لە ئەنجامی زانیارییەکەدا هاتووە، سامانەکەی ئێستای کەین خۆی دەدات لە بەهای 91 ملیۆن پاوەند. ئەوەش واتا زیادکردنی بڕی سامانەکەی بە ئەندازەی 16 ملیۆن پاوەند لەچاو سەرەتای ئەم ساڵ.
