ئه‌مریکا
چوار یاریزانی خانمانی بوکا جونیۆرز لە زیندان ئازادکران
یاریگا-چوار کچە یاریزانی یانەی بوکا جونیۆرزی ئەرژەنتینی بە کەفالەت ئازادکران دوای ئەوەی لە بەڕازیل لەسەر رەگەزپەرستی زیندانی کران.
لە یاری نێوان گریمیۆی بەڕازیلی و بوکا جونیۆرزدا، یەکێک لە کچەکان بینرا کە لاسایی مەیمون دەکاتەوە بە رووی یەکێک لە تۆپ هێنەرەوەکانی یاریگادا، دواتر بووە پێکدادانی نێوان هەردوو یانە و سەرەنجام ناوبژیوان شەش یاریزانی بوکا جونیۆرزی بە کارتی سوور کردە دەرەوە، بەوەش یارییەکە کۆتایی هات و بە بردنەوە بۆ گریمیۆ هەژمارکرا.
لەوێدا کۆتایی نەهات و پۆلیس راستەوخۆ کەوتە لێکۆڵینەوە، هەر لە نێو یاریگا چوار لە کچە یاریزانەکان لەلایەن پۆلیسەوە دەستگیرکران بە تۆمەتی رەگەزپەرستی، دواتر سەرجەمیان شەوی کریسمس یان لە زیندان بەڕێکرد تاوەکو ئەمڕۆ دادگایەکی ساو پاولۆ بە کەفالەت ئازادیکردن بەو مەرجەی نابێت بەڕازیل جێبهێڵن.
