لە پرێمەرلیگەوە پەیوەندی بە نوێنەرانی ئۆسیمینەوە کراوە
یاریگا –
پێدەچێت ڤیکتۆر ئۆسیمین لەمەودوا لە خولی ئینگلیزی ببینرێتەوە و هەمووشتێکی لەگەڵ ناپۆلی کۆتایی پێهاتووە.
هێرشبەرە نەیجیریەکە کە ئێستا بەخواستن یاریی بۆ گالاتاسەرای تورکی دەکات، ئاستێکی نایاب لەگەڵ ئەو یانەیە پێشکەش دەکات و توانیویەتی لێهاتووی خۆیی لە هەژاندنی تۆڕی گۆڵەکان پیشانی گەورەکانی ئەوروپا بدات.
بەگوێرەی زانیارییەکانی ساشا تاڤۆلیێری رۆژنامەنووسی بەلجیکی کە سکای سپۆرتیش بڵاویکردووەتەوە، یانەی مانچێستەر یونایتد پەیوەندیان بە نوێنەرانی یاریزانە 25 ساڵانەکەوە کردووە بۆ گفتوگۆکردنی بابەتی گواستنەوەی بۆ ئۆڵدترافۆرد.
بەپێی سەرچاوە ئینگلیزیەکان، ناپۆلی لە بەرامبەر دەستبەرداربوون لە هێرشبەرەکەی، داوای 75 ملیۆن یۆرۆ دەکات.
ئەو نرخەش زۆر کەمترە لەو بەهایەی کە پێشتر یانە ئیتاڵییەکە خستبوویە سەر ئۆسیمین. دابەزاندن لە نرخەکەشی لە ترسی ئەوەیە ئەو یاریزانە لە ساڵی 2026 هەروا لێنەڕوات کاتێک لەو ساڵەدا گرێبەستەکەی کۆتایی دێت
🆕🔄 @SkySportCH
⚽️ Paul Pogba, Dani Olmo, Victor Osimhen, Rayan Cherki, Axel Disasi… ⬇️https://t.co/DAbUAJTmz4 #mercato #CFC #MUFC #OL #OM #Napoli #GalatasaraySK
— Sacha Tavolieri (@sachatavolieri) December 23, 2024
روبن ئامۆریم بەدوای هێنانی هێرشبەرێکی ئاستبەرزادە دەگەڕێت پاش ئەوەی هەموو ئاماژەکان بەڕێکردنی مارکوس راشفۆرد پشتڕاست دەکەنەوە کە بەتەواوەتی لە پلانەکانی راهێنەرە پۆرتوگالییەکەدا نەماوە.
ئۆسیمین لە 11 یاریی خولی تورکی بەشداری 12 گۆڵی کردووە (9 گۆڵ و 3 ئەسێست). لە یۆرۆپالیگیش لە 4 یاریدا 3 گۆڵ و ئەسێستێکی هەیە.
هەوڵی مان یونایتد لەم پێناوەدا هەروا ئاسان نابێت، بەوپێیەی چێڵسی و پاریس سانجێرمانیش ماوەیەکی زۆرە نیازیان لە گواستنەوەی ڤیکتۆر هەیە.
