یانەیەک ئامادەیە پارەی سزای هەڵوەشاندنەوەی گرێبەستی نیکۆ ویلیامس بدات
یاریگا-نیکۆ ویلیامس لە دەرەوەی ئیسپانیا داواکراوە و پاریس سان جێرمان ئامادەیە بڕە پارەی سزای هەڵوەشاندنەوەی گرێبەستەکەی بدات.
هاوینی رابردوو، دەنگۆی پەیوەندیکردنی نیکۆ بە بارسێلۆناوە بەهێز بوو، هەرچەندە بڕیار وابوو بارسا لە زستان دا دووبارە هەوڵ بۆ ئەو یاریزانە بدات بەڵام چیتر پێناچێت ئەو رێککەوتنە رووبدات.
بەگوێرەی ئیستادیۆ دیپۆرتیڤۆ، پاریس سان جێرمانی فەڕەنسی ئامادەیە 60 ملیۆن یۆرۆ بدات و گرێبەستی ئەو یاریزانە لەگەڵ بلباو هەڵبوەشێنێتەوە ئەگەر خودی یاریزانەکە بەوە رازی بێت.
پاریس لەلایەن لویس ئێنریکێ بەڕێوەدەبرێت کە راهێنەری پێشووی بارسێلۆنا و ئیسپانیایە، بەگووتەی سەرچاوەکە ئێنریکی دڵخۆش نیە لەگەڵ ئاستی هێرشبەرەکانی یانەکەی و پێی وایە ئەستێرەکەی ماتادۆر بژاردەیەکی نایابە بۆ پتەوکردنی یانەکەی.
پاریس لە فەڕەنسا دۆخی باشە، بەڵام لە ئەورووپا لەژێر هەڕەشەی ماڵئاواییکردنە لە خولی پاڵەوانەکان و لە پلەی 25هەمی ریزبەندییەکەدایە.
