ریال مەدرید سکاڵا لەسەر سیستەمی ڤار تۆمار دەکات

یاریگا –

ریال مەدرید بەهۆی بەکارنەهاتنی سیستەمی ڤار لە یاریی رایۆ ڤاییکانۆ لە فیدراسیۆنی تۆپی پێی ئیسپانیا سکاڵا تۆمار دەکات.

رۆژنامەی مارکای ئیسپانی ئاشکرایکردووە، یانەی ریال مەدرید لە فیدراسیۆنی تۆپی پێی ئیسپانی و لێژنەی ناوبژیوانان سکاڵا لەسەر رووداوەکانی یاریی بەرامبەر رایۆ ڤاییکانۆ تۆمار دەکات، بەهۆی ئەوەی لەو یارییە ڤار هیچ پێداچوونەوەیەکی بە بڕیاری ناوبژیواندا نەکرد، کاتێک لە خولەکی 74 گومان هەبوو لێدانێکی سزا بۆ ریال مەدرید هەبێت.

یانەی ریال مەدرید بڕوای وایە جگە لەوەی مونوێرا مارتینێز ناوبژیوانی یارییەکە لە خولەکی 74 لێدانێکی سزای بۆ ڤینیسیوس جونیۆر هەژمار نەکرد، گۆنزالێس فویرتێس ناوبژیوانی ڤار لەو رووداوە هیچ هەڵوێستێکی نەبوو، داوای لە ناوبژیوانی یارییەکە نەکرد بچێت سەیری رووداوەکە بکاتەوە و پێداچوونەوە بە بڕیارەکەیدا بکات.

کەناڵی ریال مەدرید هێرشێکی توند دەکاتە سەر لالیگا و بە ‘خولە پیسەکەی نیگرێرا’ ناوی دەبات

خۆسیێ فیلێکس دیاز رۆژنامەنووسی ئیسپانی لە رۆژنامەی مارکای ئیسپانی ئاشکرایکردووە، وەرزی رابردوو کاتێک ریال مەدرید مارتینێز مونێرای بەوە تۆمەتبار کرد، بەشێک بووە لە هۆکارەکانی سووکایەتییەکان لەدژی ڤینی، لێژنەی ناوبژیوانان بەرگری لەو ناوبژیوانە کرد.

ریال مەدرید لە یاریی بەرامبەر رایۆ ڤاییکانۆ کە 3-3 یەکسانبوون، بڕوای وایە ناوبژیوانی یارییەکە دوو لێدانی سزای بۆ ئاردا گولەر و ڤینیسیوس جونیۆر هەژمار نەکردووە، بەتایبەتی لە رووداوەکەی ڤینی، تەنانەت راهێنەری رایۆ ڤاییکانۆش بڕیارەکەی ناوبژیوانی پشتڕاست نەکردەوە.