لامین یاماڵ لە بۆنەی وەرگرتنی خەڵاتی کوڕی زێڕین (گۆڵدن بۆی) بەشدارنابێت بەهۆی کێشەی دارایی لە نێوان بارسێلۆنا و رۆژنامەی توتۆسپۆرتی رێکخەری خەڵاتەکە.
یاماڵ سەرکردایەتی ئیسپانیای کرد بۆ یۆرۆی 2024 و لەگەڵ یانەکەشی ئاستێکی بەرز نیشان دەدات، سەرەنجام خەڵاتی گۆڵدن بۆی بردەوە وەکو باشترین لاوی خوار 21 ساڵ.
بڕیار وایە سبەینێ 12/16 ئاهەنگی دابەشکردنی خەڵاتەکانی بەڕێوەبچێت و دەبوو سێ ئەندامی بارسێلۆنا بەشداربن، ئەوانیش یاماڵ لە تیمی پیاوان و هەریەک لە ڤیکی لۆپێز و ئەیتانا بۆنماتی بوون لە تیمی خانمان. بەڵام بەگوێرەی ریلیڤۆ گەشتەکە هەڵوەشاتەوە بەهۆکاری ئەوەی توتۆ سپۆرت ئامادە نەبووە بلیتی فڕۆکەکەیان بکات بە بزنس کڵاس و لە ریزی ئابووری بلیتی بۆ بڕیون هەروەها لە نێو ئیتاڵیاش دا لە هۆتێلی ئاسایی تورین جێگەی بۆ دابین کردوون،
بارساش ئەمەی بە سوکایەتی بینیووە و بڕیاریداوە گەشتی شاندەکە هەڵبوەشێنێتەوە.
خەڵاتی گۆڵدن بۆی ساڵانە دەدرێت بە باشترین یاریزانی لاو و پارساڵ جود بێڵینگهام بە کۆکردنەوەی 97٪ی دەنگەکان خەڵاتەکەی بردەوە.
