ئەیسی میلان دەیەوێ دۆخی نێوان لویس دیاز و لیڤەرپوول بقۆسێتەوە

یاریگا –

یانەی ئەیسی میلان چاودێری دۆخی نێوان لویس دیاز و لیڤەرپوول دەکات کە ئێستا ئەو یاریزانە پەڵپی لە یانەکەی گرتووە.

بەپێی زانیارییەکانی ماڵپەڕی AnfielWatch کە سەرچاوە ئینگلیزیەکانیش بایەخیان پێداوە، دیاز بۆ واژۆکردنی نوێکردنەوەی گرێبەستەکەی داوای بەرزکردنەوە مووچەکەی دەکات.

هێرشبەرە کۆڵۆمبیەکە کە زستانی 2022 لە پۆرتۆوە گواسترایەوە بۆ لیڤەرپوول، لە هاوینی 2027 گرێبەستەکەی بەسەردەچێت. مووچەی هەفتانەی ئێستا وەریدەگرێت 55 هەزار پاوەندە.

ئەو سەرچاوەیە زانیویەتی کە ئێستا دیاز لە ریزبەندی 16 دێت لە رووی مووچەوە لەنێو یارزانەکانی یانەکەی. هەر بۆیە داوا دەکات بۆی بکرێت بە 125 هەزار پاوەند.

میلانیش بە وردی چاودێری دەکات تا بیگوازێتەوە ریزەکانی.

بەو داخوازیە، گۆڵکارە تەمەن 27 ساڵانەکە نەک هەر مووچەکەی دووقات دەکاتەوە، بەڵکو دەیەوێ ببێت بە یەکێک لە بەرزترین مووچەکانی یانەکەی و نزیکبێتەوە لە داروین نونێز و دیۆگۆ جۆتا کە ئەوان هەفتانە 140 هەزار وەردەگرن.

لە باری رێکنەکەوتن، میلان سوود لە دەرفتەکە دەبینێت و لەو یاریزانە دەچێتەپێشەوە کە وەک باشترین جێگرەوە تەماشای دەکەن بۆ رافایل لیاو.