بەدواداچوونی یاریگا؛ یاریزانێکی سەیدسادق وەکو وەفایەک بێ مووچە یاریی بۆ یانەکەی دەکات

یاریگا –

عەبدوڵا غەزبان یاریزانی سەیدسادق وەکو وەفایەک بۆ سەیدسادق لەم وەرزەی خولی نایابی کوردستان تاکە یاریزانە بێبەرامبەر یاریی بۆ یانەکە دەکات.

بەگوێرەی بەدواداچوونێکی تۆڕی وەرزشی یاریگا، عەبدوڵا غەزبان ناوەڕاستکاری یانەی سەیدسادق وەکو وەفایەک بۆ یانەکەی و پێزانینێک بۆ ئەو دۆخە داراییەی یانەکە پێیدا تێدەپەڕێت، ئەم وەرزە بێبەرامبەر یاریی بۆ یانەکە دەکات، لەکاتێکدا خەڵکی کەرکووکە و تەنیا بۆ یارییەکانی سەیدسادق گەشت دەکات و دەگەڕێتەوە.

عەبدوڵا غەزبان (34 ساڵان) وەرزی رابردوو لە خولی پلە یەکی کوردستان لە ریزی یانەی قەڵادزێ یاریی دەکرد و هاوینی رابردوو بڕیاریدابوو بەیەکجاریی واز لە یاریکردن بهێنێت، بەڵام پێش دەستپێکی ئەم وەرزە کاتێک سەیدسادق نزیکبوو بەهۆی قەیرانی داراییەوە بەشداریی خولی نایابی کوردستان نەکات، بڕیاریدا بگەڕێتەوە و بێبەرامبەر یاریی بۆ یانەکە بکات.

تەیوب حاجی رەشید، سەرۆکی یانەی سەیدسادق لەبارەی یاریزانە وەفادارەکەی یانەکەی دەڵێت :’پێش دەستپێکی وەرز عەبدوڵا غەزبان پەیوەندی پێوە کردم و ئامادەیی خۆی دەربڕی بۆ ئەوەی یانەکەمان لەم قەیرانە رزگاری بێت، بێبەرامبەر یاریی بۆ یانەکەمان بکات، ئێمە سوپاسی دەکەین، هەرچەندە سوپاسکردن ناگاتە ئەو کارە مەزنەی ئەو دەیکات’.

یاریزانە وەفادارەکەی سەیدسادق لە لێدوانێکی تایبەتی بە تۆڕی وەرزشی یاریگا، دەڵێت :’پێش دەستپێکی ئەم وەرزە پەیوەندیم بە سەرۆکی یانەکەمانەوە کرد و ئامادەیی خۆم دەربڕی خۆبەخشانە یاریی بۆ یانەکە بکەم، گەرچی بڕیارمدابوو واز لە یاریکردن بهێنم، بەڵام کە دۆخی یانەی سەیدسادقم زانی زۆر دڵگران بووم و ویستم یارمەتی یانەکە بدەم و یانەکە لەم دۆخە رزگهار بکەین’.

غەزبان وەرزی 2020/2021 سەیدسادقی بۆیەکەمجار لە مێژوودا گەیاندە ریزی یانە نایابەکان و دوو وەرزیش لە خولی نایابی کوردستان درێسی سەیدسادقی پۆشیوە، ئەم وەرزە لە هەر حەفت یارییەکەی خولی نایابی کوردستان سەرەکی بووە و یەکێکە لە یاریزانە کاریگەرەکانی سوور و سپیپۆشەکان.

سبەی یەکشەممە لە گەڕی هەشتەمی خولی نایابی کوردستان، سەیدسادق لە دەرەوەی یاریگای خۆی دەبێتە میوانی چوارقوڕنە کە هەردوو یانە تاوەکو ئێستا لەم وەرزە هیچ بردنەوەیەکیان بەدەست نەهێناوە.