یاریگا –
چێڵسی لە نیازەکانی ریاڵ مەدرید تێگەشتووە بۆ گواستنەوەی کۆڵ پاڵمەر لە ستامفۆردبریجەوە بۆ سانتیاگۆ بێرنابیۆ، بۆیە دەیەوێ بەهەرشێوەیەک بێت رێگری لەو هەوڵە بکات.
یاری لەدوای یاریی پاڵمەر لەگەڵ بلووز دەدرەەشێتەوە و لە کۆتا یارییشیان بەرامبەر تۆتنهام لە پرێمەرلیگ بە دوو گۆڵ خۆی سەلماندەوە کاتێک توانیان 3-4 دێربی لەندەن لە بەرژەوەندی بلووز کۆتایی پێبهێنن.
لەدوای رۆشتنی تۆنی کرۆس و هەڵکشانی تەمەنی لوکا مۆدریچ کە بە ئەگەرێکی زۆرەوە ئەم وەرزە کۆتا وێستگەی دەبێت لەگەڵ مەدرید، یانە شاهانەکە چاوی لە گواستنەوەیەکی گەورەیە بۆ هێڵی ناوەند و دەستخستنەوەی باڵانس لەو هێڵە، هەربۆیە پاڵمەر بە یەکێک لە بژاردە گونجاوەکان دەزانێت.
بەگوێرەی زانیارییەکانی پێگەی فیچاخێسی ئیسپانی، ریاڵ ئێستا پاشەکشێی لەو خواستەی کردووە. ئەوەش دوای ئەوەی چێڵسی نرخی پێی رگەیاندوون نرخی گواستنەوەی ئەستێرە ئینگلیزیەکەیان 200 ملیۆن یۆرۆ دەبێت.
کارگێڕی بلووز بە راهێنارەیەتی ئینزۆ مارێسکا کە هاوینی رابردوو پۆستەکەی وەرگرت، لەسەر رێگا راستەکەی خۆیانن و وەرزێکی نموونەییان دەستپێکردووە لەسەرجەم خول و پاڵەوانێتیەکان. هەربۆیە دەیانەوێ پرۆژەکەیان بە هەبوونی رەگەزە کاریگەرەکانی ئێستایانەوە بەردەوامیی پێبدەن، پاڵمەریش کە تازە تەمەنی 21 ساڵە بە بەردی بناخەی داهاتوو دەزانن.
ژمارەکانی ئەم وەرزەی پاڵمەر ناوازەن. لە 21 یاریی خولی ئینگلیزی و کاپیتاڵ وەن توانیویەتی بەشداریی لە 21 گۆڵدا بکات (13 گۆڵ و 8 ئەسێست).
