یاریگا –
هەولێر لە یاریی ئەمڕۆ بەرامبەر کارەبا لە توانای دوو یاریزانی سەرەکی تیپەکەی بێبەش دەبێت.
هەریەک لە یاریزانانی هەولێر یوسف بن سۆدەی هێرشبەر و ئوسامە رەشیدی ناوەراستکار ئەمڕۆ ناتوانن بەرامبەر کارەبا یاریی بکەن، بن سۆدە یاریزانی پیشەگەری توونسی بە هۆی راگیرانی بۆ یارییەک لەلایەن لیژنەی تەمبێکردن لە خولی ئەستێرەکانی عێراقەوە بێبەش دەبێت لە یارییەکەی ئەمڕۆ، هێرشبەرە توونسیەکە لە یاریی رابردوو بە هۆی نانەوەی ئاژاوە لە نێو یاریگا ئەم سزایەی بە سەردا سەپێنراوە.
ئوسامە رەشید بە هۆی ئەو پێکانەی لە رابردوو تووشی هاتووە ناتوانێ لە یارییەکەی ئەمڕۆ یاریی بکات، هەر چەندە ناوەراستکارەکەی قەڵای زەرد دەستی بە مەشق و راهێنانە سەرەتاییەکان کردۆتەوە، بەڵام بۆ یارییەکەی ئەمڕۆ ئامادە نابێت و پێدەچێت بۆ یاریی داهاتوو بەرامبەر شوڕتە کە 18ـەی ئەم مانگە بەرێوە دەچێت یاریزانەکە ناوی بخرێتە لیستی پێکهاتەی یاریزانەکان.
ئەمڕۆ ( 11ـی دیسێمبەری 2024 ) کاتژمێر 7:30ـی شەو لە گەڕی 11ـەمی خولی ئەستێرەکانی عێراق ، هەولێر لە یاریگای فرانسۆ هەریری میوانداری کارەبا دەکات.
