یاریگا –
نەورۆز لە دەرەوەی یاریگای خۆی بەبێ ئامادەبوونی چوار یاریزانی کە یەکێکیان گۆڵپارێزی سەرەکیە رووبەرووی نەفتی میسان دەبێتەوە.
لە گەڕی 11ـەمی خولی ئەستێرەکانی عێراق، چوارشەممە ( 11ـی دیسێمبەری 2024 ) کاتژمێر 2:30ـی دوای نیوەڕۆ، نەورۆز لە دەرەوەی یاریگای خۆی بەرامبەر نەفتی میسان یاریی دەکات.
لە مێژوودا نەورۆز و نەفتی میسان حەفت یاریی فەرمیان بەرامبەر یەکتر کردووە، سور پۆشەکانی سلێمانی لە یەک یارییدا براوە بوونە و نەفتی میسانیش دوو یاریی سەرکەوتنی بە دەستهێناوە و لە چوار یارییشدا یەکسان بوونە، نەورۆز حەفت گۆڵی تۆمار کردووە و لە بەرامبەردا نەفتی میسان هەشت گۆڵی تۆمار کردووە.
بۆ یارییەکە نەورۆز بێبەش دەبێت لە توانای چوار یاریزانی بە هۆی پێکانەوە، یاریزانەکانیش ئینترێس گی و موعین ئەحمەد و هاوکار جەمال و عیماد عیسای گۆڵپارێزن، نەورۆز هەشت یاریی کردووە و هەشت خاڵی هەیە و لە ریزبەندی 18ـەم دێت، نەفتی میسان نۆ یاریی کردووە 15 خاڵی هەیە و لە ریزبەندی شەشەمی خولی ئەستێرەکانی عێراق دێت.
