یاریگا –
هەولێر بە ئەنجامێکی گەورە دۆڕا و یاریدەدری راهێنەریش هۆکاری شکستەکەیان ئاشکرا دەکات.
لە گەڕی دەیەمی خولی ئەستێرەکانی عێراق، پێنج شەممە ( 5ـی دیسێمبەری 2024 ) هەولێر لە بەسڕە تووشی دۆرانێکی قورس هات و 3 _ 0 بە مینا دۆڕا، هەولێر دووەم یارییە بەدوای یەک لە دەرەوەی یاریگای خۆی یاریی دەکات و تەنها خاڵێکی بە دەستهێناوە.
حوسێن کازم یاریدەدەری راهێنەری هەولێر دەڵێت هەوڵدەدەین لە یارییەکانی داهاتوو قەرەبووی بکەینەوە، حوسێن هۆکاری شکستەکەش باس دەکات و دەڵێت:
داوای لێبوردن لە هەموو لایەک دەکەین بەهۆی ئەم شکستەوە، هەلێکی زۆرمان لە دەستدا لە یارییەکە کە هۆکاری سەرەکی شکستەکەمان بوو، خولی ئەستێرەکانی عێراق هێشتا لە سەرەتایە و باوەڕی تەواوم بە یاریزانەکانمان هەیە لە یارییەکانی داهاتوو بگەڕێنەوە سەرکەوتنەکان و ئەنجامی شایستە بە دەستبهێنن کە هاوتای ناوی هەولێر بێت.
بەم شکستە هەولێر لە ریزبەندی چوارەم بە 15 خاڵ مایەوە و میناش بە 11 خاڵ هاتە ریزبەندی 12ـەمی خولی ئەستێرەکانی عێراق، گەڕی داهاتوو هەولێر لە یاریگای خۆی رووبەرووی کارەبا دەبێتەوە.
