یاریگا-
كارلۆ ئانچێلۆتی، راهێنەری ئیتاڵی یانەی ریال مەدریدی ئیسپانی ستایشی ئاستی كیلیان ئێمباپێی فەڕەنسی و ئەستێرەی یانەكەی دەكات.
شەوی رابردوو ریال مەدرید لە یاریگای سانتیاگۆ بێرنابیۆی تایبەت بە خۆی میوانداری خێتافی كرد و یارییەكەشی بە دوو گۆڵی بێ وەڵام لێ بردەوە، لە میانی یارییەكانی گەڕی 15ی لالیگا.
گۆڵەكانی مەدرید لەلایەن جود بێڵینگهام و كیلیان ئێمباپێ تۆمار كران.
لە دوای یارییەكە كارلۆ ئانچێلۆتی گوتی:
تیمەكەم بە باشی بینی، هەموو شتێك باش بوو بە شایستەیی بردمانەوە.
ئێمباپێ پڕ وزە و مەترسیدار بوو، گۆڵێكی نایابی كرد، ئەوەش گرنگ بوو بۆ دەستگرتن بەسەر یارییەكەدا، ئەوەش ئەوەیە كە لێمان دەوێت.
هاندەران لە هەمووان باشتر لە تیپەکە و یاریزانەکان تێدەگەن ئەوان دوای یارییەکەی ئانفیڵد پاڵپشتی ئێمباپێیان کرد و ئەوەش دادپەروەرانە بوو.
کاتێک ڤینیسیۆس لە یاریگادا ئامادە دەبێت لێدانی سزا لە نێوان ئێمباپێ و ئەو یەکلاییدەبێتەوە، بەبێ بوونی ڤینیسیۆس لە یاریگادا، ئەوانەی دەبوو هەڵیبژێرن، ئێمباپێ و بێلینگهام بوون، لە نێوانیاندا بڕیاریان دا کە جود جێبەجێی بکات.
جود بەهۆی ئازارەوە نەیتوانی بەردەوام بێت، بەڵام پێم وایە دوای دوو رۆژی دیكە بە باشی ئامادە دەبێت.
ریال مەدرید بو كۆكردنەوەی 33 خاڵ لە ریزبەندی دووەمی لالیگا دێت و تەنیا خاڵێك لە دوای بارسای پێشەنگەوەیە و یارییەك كەمتریشی ئەنجام داوە.
