دوو یانە داوای دانیلۆ دەکەن
یاریگا-هەردوو یانەی ناپۆلی ئیتاڵی و مانچێستەریونایتدی ئینگلیزی هەوڵ دەدەن بۆ گواستنەوەی دانیلۆی بەرگریکاری بەڕازیلی یوڤێنتۆس.
دانیلۆی کاپتنی بیانکۆنێری بە ساتەوەختێکی باش تێناپەڕێت لەگەڵ یانەکەی و لەوەتەی تیاگۆ مۆتا بووەتە راهێنەر تەنها لە چوار یاریدا لە پێکهاتەی سەرەکی بووە. ناوبراو گرێبەستەکەی لە هاوینی داهاتوو بەسەردەچێت، بەڵام بەگوێرەی سکای سپۆرت ئیتاڵیا، ئەو دەیەوێت لە گواستنەوەی زستانەدا پەیوەندی بە یانەیەکی دیکە بکات.
هەردوو یانەی خوازیار ئاگاداری ئەم دۆخەن، ناپۆلی دەیەوێت لە ئیتاڵیا بیهێڵێتەوە و راستەوخۆ جێگەی خوان خیسوسی پێ پڕبکاتەوە لە پێکهاتەی سەرەکیدا. بەڵام ئەگەری یونایتد کەمترە بەهۆکاری ئەوەی زەحمەتە بتوانێت لەپێکهاتەی سەرەکیدا بێت. بە تایبەت کە تەمەنی گەیشتووەتە 33 ساڵ.
دانیلۆ لە 2019دا بەرامبەر 37 ملیۆن یۆرۆ روویکردە یوڤێنتۆس لە مانچێستەر سیتییەوە. لەوکاتەوە رۆڵێکی گرنگی دەگێڕا تاوەکو تیاگۆ مۆتا لەم ساڵدا بووە راهێنەری یۆڤی.
