یاریگا –
لیڤەرپوول گورزێکی کوشندەی بەردەکەوێت و ئەستێرەیەکی بۆ ماوەی نزیکەی دوو مانگ لە یاریکردن دادەبڕێت.
ماڵپەڕی DaveOCKOP نزیک لە یانەی لیڤەرپوول بڵاویکردووەتەوە، بەهۆی ئەو پێکانەی لە یارییەکەی بەرامبەر ریال مەدرید تووشی بووە، ئیبراهیما کۆناتێی بەرگریکاری رێدز بۆ ماوەی پێنج تاوەکو شەش هەفتە لە یاریکردن دادەبرێت.
چوارشەممەی رابردوو لە یارییەکانی گەڕی پێنجەمی چامپیۆنزلیگ لیڤەرپوول لە ئانفیڵد 2-0 لە ریال مەدریدی بردەوە، کۆناتێ لە دواساتەکانی یارییەکە بە تووندی بەر ئێندریکی هێرشبەری یانەی ریال مەدرید کەوت و ئازار بە ئەژنۆی گەیشت.
🚨 Exclusive: Ibrahima Konate is set to miss 5-6 weeks through injury. https://t.co/mGHQUbSiEx
— DaveOCKOP (@DaveOCKOP) November 29, 2024
بەرگریکارە فەڕەنسییەکە نەیتوانی بەشێوەیەکی ئاسایی یاریگا جێبهێڵێت و پێویستی بە یارمەتی پزیشکەکان بوو. دوای پشکنینە پزیشکییەکانیش دەرکەوتووە پێکانەکەی لە ئەژنۆیدایە و مانگ و نیوێک دادەبڕێت.
بەو هۆیە ساڵی 2024 بۆ بەرگریکارە فەڕەنسییەکە کۆتایی هات و تاوەکو ناوەڕاستی مانگی یەکی 2025 ناتوانێت یاریی بکاتەوە.
دوو سبەی یەکشەممە، لیڤەرپوول لە یارییەکانی گەڕی سێزدەی پرێمەرلیگ میوانداری مانچێستەر سیتی دەکات، بە بردنەوەی یارییەکە دەتوانێت جیاوازی خاڵەکانی لەگەڵ سیتیزنس بۆ 11 خاڵ بەرزبکاتەوە.
