ئەستێرەکەی ریال مەدرید بۆ یاریی بەرامبەر لیڤەرپوول ئامادە دەبێت
یاریگا –
پێشبینی دەکرێت ئۆریلین چوامینی، ئەستێرەی فەرەنسی ریال مەدرید بۆ یارییەکەی لیڤەرپوول ئامادە ببێت.
هەلومەرجی رکابەرییەکانی ئەم وەرزە بۆ کارلۆ ئەنچیلۆتی زۆر قورس بووە، راهێنەرەکەی ریال مەدرید هیچ بژاردەیەکی تری نییە جگە لە بەکارهێنانی یاریزانان لە پۆستە جیاوازەکاندا، ئەویش بەهۆی زۆری پێکانەوە بەتایبەت لە هێڵی بەرگری بەهۆی ئامادە نەبوونی دانی کارڤاخال و ئیدەر میلیتاو.
ستافی تەکنیکی ریال هیوایان خواست مەرجەکانی گەڕانەوەی دەیڤد ئەلابا بۆ یاریگا بە باشی بڕوات و ئەم یاریزانە زۆر زووتر وەادەی گەڕانەوەی خۆی ئامادەبێت، بەڵام ئەمە رووینەدا و تا ئێستاش بە پرۆسەی چارەسەرکردندا تێدەپەڕێت، و هەر بۆیەش زۆرێک لە یاریزانانی ئەم تیپە دەبێت بۆ پڕکردنەوەی شوێنی چۆڵی بەرگریکاران لە هێڵی بەرگریدا لە یاریگادا ئامادە ببن.
یەکێک لەو یاریزانانە کە توانایەکی لە هێڵی بەرگریدا هەیە، چوامینیە. بەڵام ئەم ئەستێرە فەرەنسییە لە چەند هەفتەی رابردوودا تووشی پێکان بووە و هەوڵی داوە بە خێرایی پڕۆسەی چارەسەری خۆی تێپەڕێت، هەروەها دەگوترا ئەگەری یاریی کردنی بەرامبەر لیڤەرپوول کەمە.
بەڵام ئێستا رۆژنامەی ئاسی ئیسپانی نووسیویەتی، چوامینی دەتوانێت لە یارییەکەی بەرامبەر لیڤەرپوولدا یاوەری تیپەکەی بکات. هەرچەندە هێشتا دیار نییە ئەم ئەستێرە فەرەنسییە لە سەرەتاوە دەتوانێت لە تیپەکەدا یاری بکات، بەڵام هەوڵدەدات خۆی لە باشترین بارودۆخدا بۆ ئەم یارییە ئامادە بکات و بارودۆخی زۆر لە پێشوو باشترە.
شەوی چوارشەممەی ئەم هەفتەیە ریال مەدرید لە یەکێک لە هەستیارترین و سەرنجڕاکێشترین یارییەکانی قۆناغی کۆمەڵەکانی خولی یانە پاڵەوانەکانی ئەوروپا لە یاریگای ئەنفێڵد رووبەڕی تیپەکەی ئارنێ سلۆت دەبێتەوە.
