یاریگا –
مانچێستەر یونایتد لەبری فرۆشتنی یاریزانێکی، بیرۆکەی گۆڕینەوەی لادروستبووە.
دوێنێ سەرچاوە ئینگلیزیەکان بڵاویانکردەوە کە یانە ئینگلیزیەکە لەژێر سەرپەرشتی روبن ئامۆریم پێویستی بە 7 یاریزانی نابێت. لەوانەی، ئانتۆنی بەڕازیلی تێدایە.
یاریزانە بەڕازیلیەکە تەنانەت لەژێر سەرپەرشتی ئێریک تێن هاخدا، کە بە خواستی ئەو راهێنەرەش لە ئایاکسەوە هێنرایە مان یونایتد، هەلی سەرەکیبوونی پێنەدەدرا.
بەگوێرەی نویترین زانیاری کە سەرچاوەی دیفێنسا سێنتراڵی نزیک لە یانەی ریاڵ مەدرید بڵاویکردووەتەوە، مانچێستەر یونایتد ئارەزووی گۆڕینەوەی ئانتۆنی هەیە بە ئاردا گولەر.
دۆخی گولەر لەگەڵ شاهانەکان لەو دۆخەی ئانتۆنی لە مانچێستەر باشتر نییە و کارلۆ ئانچیلۆتی بەتەواوەتی پشتگوێی خستووە. بەجۆرێک، لەم وەرزەی لالیگادا لە کۆی 12 یاریی تەنها 270 خولەک بەشداریپێکراوە. لە چامپیۆنزلیگیش 39 خولەک.
ئەم نیازەی شەیتانە سوورەکان لەکاتێکدایە ئەمڕۆ سەرچاوەکانی ئیسپانیا بڵاویانکردەوە کە رەنگە لاوە تورکیەکە رووبکاتە ئارسیناڵ.
