پێش یارییەکەیان بەرامبەر رەمادی غازی باکوور پیشەگەرێکی گواستەوە

یاریگا –

یاریزانێکی پیشەگەری نەیجیری گەیشتە کەرکووک بۆ پەیوەندیکردن بە غازی باکوور و پێشمەرگەش لە یاریگای خۆی بەرامبەر فەهد یاریی دەکات.

لە گەڕی پێنجەمی خولی نایابی عێراق، یەکشەممە ( 17ـی نۆڤێمبەری 2024 ) پێشمەرگەی سلێمانی بۆ راستکردنەوەی باری لاری لە یاریگای خۆی رووبەڕووی فەهد دەبێتەوە، لە چوار گەڕی رابردوو نوێنەرەکەی سلێمانی ئەنجامی وەک پێویست نیە و بە چوار خاڵ لە ریزبەندی 14ـەم دێت و فەهدیش بە هەمان خاڵ لە ریزبەندی 13ـەم دێت.

پێش یارییەکەی بەرامبەر رەمادی، غازی باکوور گەیشتنی یاریزان ماشودی هێرشبەری نەیجیری بۆ تیپەکەی راگەیاند کە پێشووتر گرێبەستی لەگەڵ واژۆکردبوو، غازی باکوور لە سێ یارییدا چوار خاڵی هەیە و لە ریزبەندی 16ـەم دێت، رەمادیش لە چوار یارییدا شەش خاڵی هەیە و لە ریزبەندی پێنجەم دێت.

لە یاریگای هەندرێن ناسڕیە بە راهێنەرایەتی رەوەند عەبدولخالق کە بە باشترین راهێنەری گەڕی رابردووی خولی نایابی عێراق دەستنیشانکرا میوانداری حوسێن دەکات، ناسڕیە بە شەش خاڵ لە ریزبەندی شەشەمە و حوسێنیش لە سێ یارییدا دوو خاڵی هەیە و لە ریزبەندی 20ـەم و کۆتایی دێت.