لە یاریی مایک تایسن و جەیک پۆڵ چی روویدا؟
مستوەشێنە بەناوبانگەکە بە یوتیوبەرێک دۆڕا
یاریگا –
بە ئامادەبوونی زیاتر لە 72 هەزار کەس بەرەبەیانی ئەمڕۆ لە تێکساس، جەیک پۆڵ (27 ساڵان) لە یارییەکی مێژووییدا لە یاریی مشتەکۆڵە لە مایک تایسن (58 ساڵان)ـی بردەوە.
کوڕە سەربەکێشەکە چۆن لە خراپترین پیاوی سەر زەوی بردەوە؟
جەیک پۆڵ لە هەشت گەڕدا بە ئەنجامی (80-72، 79-73، 79-73) لە مایک تایسنی بردەوە، کە ئامارەکان دەریانخستووە جەیک پۆڵ لەکۆی 278 هەوڵیدا توانیویەتی 78 جار لە رکابەرەکەی بدات، تایسنیش لەکۆی 97 هەوڵی 18 جار رکابەرەکەی پێکاوە.
جەیک و تایسن بە درێژایی یارییەکە کێبڕکێێ یەکترییان دەکرد و هەردووکیان یارییەکی هاوسەنگیان دەکرد، بەبێ ئەوەی هیچ لێدانی کوشندە هەبێت.
هەریەکەیان چەندیان لە یارییەکە دەستکەوت؟
یارییەکە سەرنجێکی زۆری لە تەواوی جیهان لەسەربوو، تایسن دوای وازهێنانی لە یاریکردن بۆ ئەم یارییە گەڕابووەوە و پۆڵیش یوتیوبەرێکی بەناوبانگە و خاوەنی هەوادارێکی زۆرە، ئەم یارییە جگە لەوەی لە ئەمریکا چاوێکی زۆری لەسەر بوو، زیاتر لە 70 هەزار کەس بلیتەکانی یارییەکەیان کڕیبوو، تۆڕی نێتفلێکس راتسەوخۆ یارییەکەی پەخش دەکرد و مافی پەخشی یارییەکە و ریکلامە بازرگانییەکانی پەخشی یارییەکە ریکۆردیان تۆمار کردووە.
مایک تایسن 20 ساڵ بوو وازی لە یاریکردن هێنابوو، ئەو ئەفسانەیەی بۆکسێنەران لەپێناوی ئەم یارییە گەڕایەوە ناو گۆڕەپانی یاریکردن.
جەیک پۆڵ کە لە یارییەکە براوە بوو 40 ملیۆن دۆلاری دەست دەکەوێت و مایک تایسنیش گەرچی لە یارییەکە دۆڕا، بەڵام دەستبەتاڵ نابێت و 20 ملیۆن دۆلاری دەستدەکەوێت.
بەهۆی زۆری بینەران تۆڕی نێتفلیکس لەکارکەوت
لەکاتی پەخشی راستەوخۆی یارییەکە لە ئەمریکا لەلای بەشێک لە هاوبەشانی تۆڕی نێتفلیکس، کێشەی تەکنیکی دروستبوو تۆڕەکە وەستا.
ماڵپەڕی داون دیتیکتۆری ئەمریکی ئاشکرایکردووە، زیاتر لە 85 هەزار کەس لەکاتی سەیرکردنی یارییەکەی پۆڵ و تایسن پەخشی راستەوخۆیان لەلا پچڕاوە و نەیانتوانیوە سەیری یارییەکە بکەن، کە تاوەکو ئێستا نێتفلێکس هیچ روونکردنەوەیەکی لەبارەی ئەم کێشەیە نەداوە.
تۆڕی نێتفلێکس مافی پەخشی یارییەکەی وەکو تاکە سەرچاوە بەدەستهێنابوو، تەنیا لەو تۆڕە یارییەکە پەخش دەکرا.
Jake Paul bows to Mike Tyson at the end of the match. #PaulTyson pic.twitter.com/FUQGZVyADQ
— Netflix (@netflix) November 16, 2024