یانەیەکی گەورەی ئەوروپا داوای تێن هاخ دەکات

یاریگا –

هەرچەندە هێشتا هەفتەیەک بەسەر دوورخستنەوەی ئێریک تێن هاخ، لە پۆستی راهێنەرایەتی مانچێستەر یونایتد نەچووە، یانەیەکی ئیتاڵی هەڵسەنگاندنی بۆ دەکات.

راهێنەرە هۆڵەندییەکە ئێستا بێ یانەیە و رۆژنامەی گازێتا دێلۆ سپۆرت بڵاویکردووەتەوە، خاوەنانی رۆما بە هێمنی چاودێری دۆخەکە دەکەن و لەوانەیە لە چەند رۆژی داهاتوودا، بڕیاری کۆتایی لەسەر راهێنەری داهاتووی یانەکەی پایتەخت بدەن.

هەفتەی رابردوو، فرێدکینس، خاوەنانی رۆما لە لەندەن بوون و بەگوێرەی زانیارییەکانی رۆژنامە ئیتاڵییەکە بێت، یەکێکە لە ئامانجەکانی سەردانەکە، کۆکردنەوەی زانیاری زیاتربوو لەسەر تێن هاخ و ئەگەرەکانی دەستنیسانکردنی وەکو راهێنەری نوێی یانەکە.

سەرچاوەیەک بە گازێتای راگەیاندووە، تێن هاخ نایەوێت جارێکی دیکە بچێتە نێو یانەیەکی پڕکێشە و ناجێگیر.

گراهام پۆتەر و فڕانک لامپارد دوو بەربژێری دیکەن بۆ وەرگرتنی پۆستی راهێنەرایەتی رۆما.