یاریگا –
ئێمباپێ لە ریال مەدرید ئاسوودە نییە و بە تەواوەتی بێ هیوا بووە، چوارەم یارییە لەسەریەک گۆڵ ناکات.
رۆژنامەی مارکای ئیسپانی لە راپۆرتێکیدا ئاشکرایکردووە، کیلیان ئێمباپێ هێرشبەری ریال مەدرید دوای فیکەی کۆتایی یارییەکەی ئۆساسۆنا یەکسەر گەڕاوەتەوە ژووری جلگۆڕین، بەبێ ئەوەی سڵاو لە هاندەران بکات و دەستخۆشی لە هاورێیەکانی بکات.
رۆژنامە مەدریدییەکە راشیگەیاندووە، زمانی جەستەی ئێمباپێ لە یارییەکەی ئۆساسۆنا هەموو شتێکی دەرخست، ناوە ناوە سەری دەگرت و بەردەوام دەستی بەرز دەکردەوە و داوای تۆپی لە هاوڕێیەکانی دەکرد، ئێمباپێ سەرەڕای ئەوەی یانەکەی لە یارییەکە بردنەوەی بەدەستهێنا، بەڵام لەبەر ئەوەی چوارەم یارییە لەسەریەک گۆڵ ناکات، بە بردنەوەکەیان دڵخۆش دەرنەکەوت.
مارکا ئاشکراشیکردووە، گەرچی بەردەوام لەنێو ماڵی ریال مەدرید دەڵێن ئێمباپێ لەگەڵ تیپەکەیان گونجاوە و ئاسوودەیە، بەڵام دۆخەکە لەسەر لاکێشەی سەوز پێچەوانەیە، کیلیان لە شوێنی دڵخوازی خۆی یاریی ناکات و ڤینیسیۆس جونیۆر لە شوێنی ئەو لە باڵی چەپ یاریی دەکات و بووەتە سەرکردەی یەکەمی یانەکە.
دوای یارییەکەی ئۆساسۆنا، کارلۆ ئەنچیلۆتی راهێنەری ریال مەدرید لەبارەی ئاستی ئێمباپێ گوتی :’راستە ئێمباپێ لە یارییەکە گۆڵی نەکرد، بەڵام ئاستێکی بەرزی لە یارییەکە پێشکەش کرد’.
ئێمباپێ لەوەتەی رۆژی 19ـی مانگی رابردووەوە هیچ گۆڵێکی نەکردووە، کە لەوەتەی پەیوەندی بە ریال مەدریدەوە کردووە لە 16 یاری 8 گۆڵ و 2 ئەسیستی کردووە کە 3 گۆڵی بە پێناڵتی بوون.
