ریال مەدرید شوێنگرەوەی کرووس دەستنیشان دەکات

یاریگا –

ریال مەدرید وێڵە بە دوای دۆزینەوەی جێگرەوەی تۆنی کروس و لوکا مۆدریچ، دەیەوێت بەزووترین کات کێشەکانی هێڵی ناوەڕاست چارەسەر بکات.

تۆڕی فیکاخێس بڵاویکردووەتەوە، کارلۆ ئانچێلۆتی سوورە لەسەر چارەسەرکردنی کێشەکانی هێڵی ناوەڕاست، ئەمەش دوای شکستهێنانی ئۆرێلیەن چوامینی، لە چارەسەرکردنی کێشەکان.

بەگوێرەی راپۆرتی تۆڕەکە بێت، ریال مەدرید ئامادەیە بڕی 84 ملیۆن پاوەند بۆ گواستنەوەی ئێنزۆ فێرناندێز، یاریزانی چێڵسی و ئەرجەنتین خەرج بکات.

ئێنزۆ یەکێکە لە دیارترین یاریزانانی ئەرجەنتین و لە مۆندیالی 2022 ئاستێکی بەرزی لەگەڵ تانگۆ پێشکەشکرد.

ئەمە دووەم ساڵی ئێنزۆیە لەگەڵ چێڵسی، بەڵام نەیتوانی ئاستی چاوەڕوانکراو پێشکەش بکات، هەرچەندە یاریزانی سەرەکییە.

راپۆرتەکە لە زاری بەرپرسانی نێو یانە شاهانەکە بڵاویکردووەتەوە، لە مەدرید ئێنزۆ بە باشترین شوێنگرەوەی کرووس دادەنێن و پێیان وایە، لە چێڵسی نازانن باشترین ئاستی ئێنزۆ دەربخەن.

ریال مەدرید ئامادەیە ئۆرێلیەن چوامینی، یاریزانی فەڕەنسی بکاتە بەشێک لە گرێبەستەکە، تاوەکو نرخی ئێنزۆ کەمبکەنەوە و دەستەی گارگێڕی چێڵسیش رازی بکەن.