یاریگا –
کریستال پاڵاس تووشی قەیرانێکی قووڵی پێکانی یاریزانان بووەتەوە و ئەمڕۆ هەشت یاریزانی سەرەکی ناتوانن یاریی بکەن.
ئەمڕۆ پاڵاس رووبەڕووی وۆلڤز دەبێتەوە و ئەستێرەی وەکو ئێبێرێچی ئیزێ و ئادام وارتن بەشداری یارییەکە ناکەن.
ئیزێ لە یاریی بەرامبەر ئاستۆن ڤیلا لە جامی کاراباو تووشی پێکان بوو، لەلایەکی دیکەشەوە ئۆلیڤەر گلاسنەر، راهێنەری پاڵاس دووپاتیکردەوە، وارتن ناچارە نەشتەرگەری بکات و بۆ ماوەیەکی درێژ دووردەکەوێتەوە.
جیا لە ئیزێ و وارتن، هەریەکە لە کریس ریچاردس، شادی ریاز، جێفێرسن لێرما و ماتیوس فرانکا بەهۆی پێکانی جیاوازەوە یاریی ناکەن.
راهێنەری پاڵاس تەنیا 12 یاریزانی تیمی یەکەمی لەبەردەستە، بۆیە چەند یاریزانێکی تیمی دووەمی بانگهێشتکردووە.
دانیێل مونۆز، لە سەرەتای پرێمەرلیگ و لە یاریی بەرامبەر لیڤەرپوول، تووشی پێکانی ران بووە و پێناچێت تاوەکو تەواوبوونی یارییەکانی نێودەوڵەتی ئەم مانگە، یاریی بکات.
