ریال مەدرید بڕیار لەسەر چارەنووسی ڤینیسیۆس جونیۆر دەدات
تۆڕی رێلێڤۆ نوێترین زانیارییەکان ئاشکرا دەکات
یاریگا –
سەرەڕای لەدەستدانی خەڵات باڵۆن دۆر، ریال مەدرید دەیەوێت ڤینیسیۆس جونیۆر بە نوێکردنەوەی گرێبەستەکەی قەرەبووبکاتەوە.
تۆڕی رێلێڤۆ بڵاویکردووەتەوە، ریال مەدرید پەیوەندییەکانی لەگەڵ نوێنەری ڤینیسیۆس دەستپێکردووە و باسی نوێکردنەوەی گرێبەستییان لەگەڵدا کردووە.
بەگوێرەی زانیارییەکانی تۆڕەکە بێت، چەند مانگێک لەمەوبەر، گفتوگۆکانی نێوان بەرپرسانی ریال مەدرید و بەڕێوەبەری کارەکانی ڤینیسیۆس دەستیپێکردووە، ئەمەش دوای پێشکەشکردنی ئاستێکی بەرز لە وەرزی رابردوودا و بردنەوەی چامپیۆنزلیگ.
El Madrid quiere premiar a Vinicius con otra renovación y el jugador no tiene prisa.
◾️ El club blanco se acercó hace un par de meses al entorno del brasileño.@MatteMoretto 🤝 @JorgeCPicon https://t.co/f4uiABmwEH
— Relevo (@relevo) October 31, 2024
ئۆفەرەکەی ریال مەدرید لە ئۆفەری رابردووی گەورەترە و جیا لەمەش، ریال مەدرید ویستوویەتی ڤینیسیۆس لە گرنگی خۆی تێبگات و کاریگەری کیلیان ئێمباپێی لەسەر نەبێت و هەر وەکو ئەستێرەیەکی گەورە لە یانەکەدا خۆی ببینێتەوە.
تۆڕی رێلێڤۆ روونیدەکاتەوە، گفتوگۆکانی بەرەوپێشچوونی ئەوتۆیان بەخۆیەوە نەبینیوە، بەڵام ڤینیسیۆس سوپاسی دەستەی کارگێڕی یانەکەی کردووە و ڤینی نایەوێت پەلە لە نوێکردنەوەی گرێبەستەکەی بکات.
گرێبەستی ئێستای ڤینیسیۆس لە هاوینی ساڵی 2027 بەسەردەچێت و لە کۆتایی ساڵی رابردوو نوێکرایەوە. هەرچەندە گفتوگۆکانی نوێکردنەوەی گرێبەستی پێشووی لە هاوینی ساڵی 2022 دەستیانپێکرد، بەڵام راگەیاندنی گرێبەستەکە لە ئۆکتۆبەر/تشرینی یەکەمی ساڵی 2023 روویدا.
