یاریگا –
ڤینیسیۆس جونیۆر خەڵاتی باڵۆن دۆر ناباتەوە، تەنانەت هێرشبەرە بەڕازیلییەکە لە رێوڕەسمەکەش ئامادە نەبێت، رۆدری خەڵاتەکە دەباتەوە.
کەناڵی RMC Sportـی فەڕەنسی ئاشکرایکردووە، ڤینیسیۆس جونیۆر و کەسانی دەوروبەری بڕوایان وایە هێرشبەرە بەڕازیلییەکە ئەمشەو خەڵاتی باڵۆن دۆر بەدەست ناهێنێت، بەڵکو دەدرێتە رۆدری ناوەڕاستکاری ئیسپانی یانەی مانچێستەر سیتی ئینگلیزی، لەم کاتژمێرانەی دوایی ڤینی بڕوای تەواوی لەلا دروستبووە ئەمشەو تۆپی زێڕین ناباتەوە.
کەناڵە فەڕەنسییەکە راشیگەیاندووە، تەنانەت لەناو ماڵی ریال مەدریدیش بڕوایان وایە ئەمشەو ڤینی خەڵاتی باڵۆن دۆر ناباتەوە، بۆیە ڤینیسیۆس بەهۆی بێ هیوابوونی ئامادەی رێوڕەسمەکە نەبێت و لە ریال مەدرید هیچ کەسێک ئامادەی رێوڕەسمەکە نابێت.
رۆژنامەی مارکای ئیسپانی ئاشکرایکردووە، شاندی یانەی ریال مەدرید وەکو هەڵوێستێک لە بەرامبەر بێبەشبوونی ڤینیسیۆس لە خەڵاتەکە، گەشتەکەی بۆ پاریس هەڵوەشاندەوە، لەکاتێکدا وابڕیاربوو ڤینی گەشتی پاریس بکات و ئامادەی رێوڕەسمەکە بێت، فلۆرێنتینۆ پێرێز و کارلۆ ئەنچیلۆتی و جود بێڵینگهام ئامادەی رێوڕەسمەکە نابن.
خۆسێ لویس سوانچێز رۆژنامەنووسی ئیسپانی ئاشکرایکردووە، رۆدری خەڵاتی باڵۆن دۆری 2024 دەباتەوە و ڤینیسیۆس جونیۆر پلەی دووەم بەدەست دەهێنێت و جود بێڵینگهامیش پلەی سێیەم بەدەست دەهێنێت.
پێشتر رۆژنامەی مارکای ئیسپانی ئاشکرایکردبوو، ڤینیسیۆس جونیۆر خەڵاتی باڵۆن دۆری 2024 دەباتەوە، بەڵام گۆڤاری فڕانس فوتبۆڵ چەند جارێک دووپاتیکردووەتەوە، بەهیچ شێوەیەک تاوەکو ساتی دابەشکردنی خەڵاتەکە براوەی باڵۆن دۆر ئاشکرا نابێت.
