یاریگا –
ڤینیسیوس و چەند ئەستێرەیەکی پێشووی تۆپی پێ دەستیان لە ساختەکاری گەورەی دراوی کریپتۆدا هەبووە.
پۆرتاڵی “ئێل دیارۆ” ناوی ئەستێرەکانی تۆپی پێی و پێشەرگە دێرینەکانی راگەیاند کە بەهۆی رێکڵام کردن بۆ کۆمپانیایەکی ساختە بەناوی “ئۆمێگاپرۆ” سکاڵایان لەسەر تۆمار دەکرێت.
لە راپۆرتێکدا کە ئەمڕۆ بڵاوکراوەتەوە، سایتەکە رایگەیاندووە، سەدان کەس کە بوونەتە قوربانی بۆرسە و دراوی ئێلێکرۆنی، پلانیان هەیە سکاڵا لەسەر بیست یاریزانی تۆپی پێ تۆمار بکەن بەهۆی یکلامکردن بۆ کۆمپانیای ئۆمیگاپرۆ، ئەو کۆمپانیایە کە ساختەکارییەکەی کردووە.
لەنێو یاریزانەکاندا ڤینیسیۆسی یاریزانی ریال مەدرید، رۆناڵدینیۆ، کاکا، لویس فیگۆ، ئیکەر کاسیاس، کارلۆس پویۆڵ، ئێریک ئەبیدال، رۆبێرتۆ کارلۆس و فێرناندۆ هیێرۆ دەبینرێن.
کۆمپانیای ئۆمیگا پرۆ 3 ملیار یۆرۆی خستۆتە گیرفانی خۆیەوە بە بەڵێنی 300% گەڕانەوەی تەنیا لە ماوەی 14 مانگدا پێداون. بەشێک لە یاریزانەکان بەشدارییان لە بانگەشەییەکان کردووە و هەندێکی دیکەش لە رێگەی سۆشیال میدیاوە رێکڵامیان بۆ کۆمپانیاکە کردووە.
یەکێک لە هۆکارەکانی سکاڵاکردن لەسەر کەسانی پەیوەندیدار ئەوەیە کە ناوبانگیان وایکردووە قوربانییەکان متمانە بە پەیامەکەیان بکات.
لەم راپۆرتەدا ئاماژە بەوە کراوە کە سێ لە بەرپرسانی ئەم کۆمپانیایە ئێتستا لە زیندانن و دوو کەسیش هەڵهاتوون. هەروەها روون کراوەتەوە کە دەزگاکانی رێکخستنی چەند وڵاتێک پێشتر هۆشدارییان داوە کە کۆمپانیاکە جێی متمانە نییە.
ساختەکارییەکە لە ساڵی 2022 روویدا و لیژنەی بازاڕە داراییەکانی ئیسپانیا دوو ساڵ پێشتر، لە ساڵی 2020دا، ئۆمیگاپڕۆی بۆ لیستی بازرگانییە داراییە ناشەفافەکانی زیادکردبوو.
