فلیک چارەنووسی یاریزانە پێکراوەکانی بارسێلۆنای بۆ یاریی سبەی یەکلاکردەوە

یاریگا –

فلیک چارەنووسی یاریزانە پێکراوەکانی بارسێلۆنای بۆ یاریی سبەی یەکلاکردەوە و ئامادەبوونی لامین یامالی لە یارییەکەی سێڤییا ئاشکراکرد.

هانزی فلیک، راهێنەری بارسێلۆنا لە کۆنگرەی رۆژنامەوانی پێش یارییەکەی سێڤییا لەبارەی دۆخی یاریزانە پێکراوەکانی یانەکەی گوتی :’لامین یامال چاکبووەتەوە و گەڕاوەتەوە، ئەو زۆر باشە، دەتوانین پێتان بڵێین ئەو ئامادە دەبێت، سووپاسی راهێنەری ئیسپانیا دەکەم لە یاریی دووەمی هەڵبژاردەکەی پشووی پێدا’.

راهێنەرەکەی بارسا گوتیشی :’بزانین سبەی چی بۆ دی یۆنگ روودەدات، بەشداریی راهێنانە بەکۆمەڵەکانی یانەکەمانی کرد، بەشێکی راهێنانەکانیشی بە تەنیا کرد، با بزانین سبەی چ بڕیارێک لەبارەی بەشداریکردنی لە سەرەتای یارییەکە دەدەین، لەوانەیە بتوانێت بە سەرەکی بەشداریی یارییەکە بکات’.

فلیک لەبارەی یاریزانە پێکراوەکانی دیکەی یانەکەی گوتیشی :’سبەی یاریزانە پێکراوەکانمان لەگەڵ دەبێت، بەڵام ناتوانم پێتان بڵێم سبەی بە سەرەکی یاریی دەکەن، دۆخی گاڤی جیاوازە لەوانەیە لەسەر کورسی یەدەک بێت، فێرمین و ئۆلمۆش ئامادەن و دەتوانن سبەی یاریی بکەن و لە ئامادەباشیدان، با بزانین سبەی چی روودەدات’.

سبەی لە گەڕی دەیەمی لالیگا، بارسێلۆنا لە یاریگای خۆی میوانداریی سێڤییا دەکات، کە بارسا بە کۆکردنەوەی 27 خاڵ لە پێشەنگی خولەکە دێت.