یاریگا –
بەهۆی ئەو پێکانە قورسەی لە ئەژنۆی تووشی بووە، گومانەکان لە دووبارە گەڕانەوەی ئالابا بۆ یاریگاکان زیاتر دەبێت و دەنگۆی ئەوە هەیە بەرگریکارە نەمساییەکە ناچار بێت بەیەکجاریی واز لە یاریکردن بهێنێت.
فابریزیۆ رۆمانۆ رۆژنامەنووسی ئیتاڵی رایگەیاندووە، ئەو دەنگۆیانەی لەبارەی پێکانەکەی داڤید ئالابا بەرگریکاری نەمسایی یانەی ریال مەدرید بڵاوبوونەتەوە دوورن لە راستییەوە، ئالابا بەهۆی پێکانەکەی بەیەکجاریی واز لە یاریکردن ناهێنێت، بەڵکو بەرگریکارەکەی ریال لەسەر رێگایەکی دروست دەڕوات بۆ ئەوەی لە پێکانەکەی چاک بێتەوە و دووبارە دەست بە یاریکردن بکاتەوە.
رۆمانۆ راشیگەیاندووە، پزیشکەکان و راهێنەرانی توانای جەستەیی ئالابا لە پرۆسەی چاکبوونەوەی ئالابا رازین و بەرگریکارەکە رۆژ بە رۆژ باشتر دەبێت.
رادیۆی کادێنا سێری ئیسپانی ئاشکرایکردووە، دوو رۆژە لەسەریەک ئالابا مەشق و راهێنانی چڕ و بەهێز دەکات، بەبێ ئەوەی هەست بە هیچ ئازارێک بکات، کە نزیکەی ساڵێکە بەهۆی پێکانی ئەژنۆی لە یاریگاکان دابڕاوە.
میدیاکانی ئیسپانیا ئاشکرایان کردووە، ریال مەدرید بڕیاریداوە لە بازاڕی گواستنەوەی زستانەی یاریزانان بەرگریکارێک بگوازێتەوە ریزەکانی، کە پێشبینی دەکرێت لە دوایین رۆژەکانی ئەمساڵ ئالابا بگەڕێتەوە یاریگاکان و دووبارە دەست بە یاریی بکاتەوە، لەکاتێکدا وابڕیاربوو سەرەتای ئەم مانگە بگەڕێتەوە، بەڵام گەڕانەوەی بۆ یاریگاکان سێ مانگ دوا دەکەوێت.
