یاریگا –
پێکان هەڕەشە لە ژیانی وەرزشی ئەستێرەیەکی ریاڵ مەدرید دەکات و رەنگە جارێکیتر یاری نەکاتەوە.
کۆتاییەکانی ساڵی رابردووبوو کاتێک داڤید ئالابا بە خراپی تووشی پێکان هات لە ئەژنۆیدا و لەو کاتەوە تا ئێستا نەگەڕاوەتەوە.
بەگوێرەی زانیارییەکانی رادیۆی ئۆندا سێرۆی ئیسپانی، ئێستا دۆخەکە خراپترە وەک لە سەرەتا. سەرچاوەکە ئاشکرایکردووە کە راهێنانەکانی ریاڵ مەدرید هەڵسەنگاندنێکی باشبووە بۆ زانینی کاردانەوەی ئەستێرە نەمساییەکە، بەڵام دەرکەوتووە هێشتا ئازاری هەیە.
بەپێی هەمان سەرچاوە، ئازارە زۆرەکەی ئالابا لە راهێنانەکاندا بەهۆی کەمبوونەوەی کارتلیجەکانە لە ئەژنۆی ناوبراودا. ئەوەش وایکردووە ئێسقانەکانی لێکبخشێن و ناڕەحەتیەکی زۆری بۆ دروستبکەن.
ئەم پێشهاتە نوێیە وای لە ریاڵ مەدرید کردووە هەرچی زووە لەم زستانە دڵێکی بەرگری چەپلەر بگوازێتەوە.
یاریزانە 32 ساڵانەکە لە هاوینی 2021 لە بایرن میونشنەوە گواسترایەوە بۆ سانتیاگۆ بێرنابیۆ. لەگەڵ یانە شاهانەکە بووەتە خاوەنی دوو نازناوی لالیگا، دوو نازناوی چامپیۆنزلیگ و چەندین دەستکەوتی دیکە.
