یاریگا –
لە هەمان کاتی یارییەکەی فەڕەنسا و ئیسڕائیل، کیلیان ئێمباپێ لە یانەیەکی شەوانە دەبینرێت.
شەوی رابردوو لە یارییەکانی قۆناخی سێیەمی خولی نەتەوەکانی ئەوروپا هەڵبژاردەی فەڕەنسا رووبەڕووی هەڵبژاردەی ئیسڕائیل بووەوە و کەڵەشێرەکان 4-1 یارییەکەیان بردەوە.
بەڵام کیلیان ئێمباپێی ئەستێرەی یەکەمی فەرەنسا پشووی وەرگرت و پەیوەندی بە شاندی هەڵبژاردەکەی نەکرد، سەرەڕای ئەوی لە یاریکردن بۆ ریال مەدرید بەردەوامبوو.
ماڵپەڕی Aftonbladetـی سویدی بڵاویکردووەتەوە، لە هەمان کاتی یارییەکەی فەڕەنسا و ئیسڕائیل کیلیان ئێمباپێ لە لە ستۆکهۆڵمی پایتەختی سوید بووە و سەردانی یانەیەکی شەوانەشی کردووە.
بەگوێرەی هەمان سەرچاوە، ئەستێرە فەڕەنسییەکە سەرەتا سەردانی چێشتخانەی چێز جۆلی کردووە، دوای نان خواردن بە ئۆتۆمبێلێکی تایبەت بەرەو یانەیەکی شەوانە بەڕێکەوتووە، کە پێشوەختە لەوێ ژوورێکی تایبەتی حیجز کردووە و شەوەکەی لەوێ بەسەربردووە.
بەگوێرەی زانیارییەکانی گێت فرێنچ فووتبۆڵ نیوز، یاریزانە تەمەن 25 ساڵانییەکە بۆ گەشتەکەی مۆڵەتی لە ریال مەدرید وەرگرتووە و بە ئاگاداری یانەکەی بۆ وەرگرتنی پشوویەکی کورت گەشتی سویدی کردووە.
بەڵام هاندەرانی فەڕەنسا زۆر لە یاریزانەکە تووڕەن، تۆمەتباری دەکەن بەوەی خۆشەویستی بۆ هەڵبژاردەکەی نەماوە و هەستکردنی بە بەرپرسیارێتی لەدەستداوە.
ئەو دەرکەوتنەی کیلیان لەکاتێکدایە، دوێنێ پێنجشەممە یاریزانەکە لەگەڵ پێنتوسی راهێنەری توانای جەستەیی یانەکە پلانێکی نوێی بەرزکردنەوەی توانای جەستەییان دەستپێکردبوو، بەڵام هاندەرانی ریال مەدریدیش سەریان سوڕماوە، لە گەرمەی ئەو پلانە نوێیە کیلیان بۆ لە یانەیەکی شەوانە دەرکەوتووە.
