یاریگا –
دوای بانگهێشتکرانی ئێمباپێ بۆ یاریی ئەمشەو، فیدراسیۆنی تۆپی پێی فەڕەنسا گومانی هەیە ریال مەدرید لەبارەی پێکانی هێرشبەرە فەڕەنسییەکە فێڵی لێکردبن.
رۆژنامەی لیکیپی فەڕەنسی ئاشکرایکردووە، کیلیان ئێمباپێ گەرچی پێکانی هەیە و پێشتر بە دیدیێ دیشامپی گوتووە هێشتا نەگەڕاوتەوە دۆخی جارانی، کەچی بۆ یاریی یەمشەوی ریال مەدرید بەرامبەر ڤیاڕیال لە لالیگا بانگهێشت کراوە.
رۆژی پێنجشەممە دیدیێ دیشامپ راهێنەری هەڵبژاردەی فەڕەنسا کاتێک لیستی یاریزانەکانی بۆ دوو یاریی داهاتووی فەڕەنسا لە خولی نەتەوەکانی ئەوروپا ئاشکراکرد، رایگەیاند هێشتا ئێمباپێ بە تەواوەتی ئامادە نییە و قسەی لەگەڵی کردووە، بە تەواوەتی چاکنەبووەتەوە و پێویستی بە پشوودانی زیاترە.
Au sein de l’équipe de France, l’éventuelle participation de Kylian Mbappé au match de Liga entre le Real Madrid et Villarreal, ce samedi soir (21 heures), interroge, alors que Didier Deschamps ne l’a pas convoqué pour le prochain rassemblement afin qu’il récupère >… pic.twitter.com/qS86Cvyjqh
— L’ÉQUIPE (@lequipe) October 5, 2024
ئێمباپێ لە یاریی رابردووی ریال مەدرید بەرامبەر لیل لە چامپیۆنزلیگ نزیکەی 40 خولەک یاریی کرد، گەرچی دیشامپ رایگەیاندبوو نایەوێت سەرکێشی بە کیلیان بکات، کەچی کارلۆ ئەنچیلۆتی هێرشبەرە فەڕەنسییەکەی بۆ یاریی ئەمشەو بانگهێشت کردووە.
رۆژنامەی لیکیپ ئاشکرایکردووە، ئەگەر ئێمباپێ ئەمشەو بەرامبەر ڤیاڕیال یاریی بکات، ئەوا دەردەکەوێت ریال مەدرید فێڵی لە دیشام کردووە، کە لەوەتەی رۆژی 24ـی مانگی رابردوو کیلیان لە ماسوڵکەکانی رانی چەپی تووشی پێکان بووە و دەستەی پزیشکی ریال مەدرید و فەڕەنسا لەبارەی پێکانەکەی لە پەیوەندیدان.
لیکیپ راشیگەیاندووە، هەست دەکرێت لێکتێگەیشتنێکی تەواو لە نێوان دەستەی پزیشکی ریال مەدرید و فەڕەنسا نییە، سەرەتا وا بڵاوکرایەوە ئێمباپێ بۆ ماوەی سێ هەفتە لە یاریگاکان دادەبڕێت، کەچی دوای 8 رۆژ گەڕایەوە یاریگاکان.
کارلۆ ئەنچیلۆتی راهێنەری ریال مەدریدی ئیسپانی پێش یارییەکەی ڤیاڕیال دووپاتیکردەوە ‘ئێمباپێ هێشتا تەواو چاک نەبووەتەوە و ٪100 ئامادە نییە’، بەڵام ئەگەر ئەمشەو ئێمباپێ یاریی بکات، ئەوا گومانەکان لە فێڵکردنی مەدریدییەکان زیاتر دەبێت.
