پریڤیوی یاری لیل V ریال مەدرید؛ دوا هەواڵ و پێكهاتەی پێشبینیكراو

یاریگا –

ئەمڕۆ ریال مەدرید لە دووەم یاری خۆیدا لە خولی یانە پاڵەوانەكانی ئەوروپا رووبەڕووی لیل دەبێتەوە.

وا بڕیارە ئەمڕۆ چوارشەممە كاتژمێر 22:00 بە كاتی كوردستان لیل لە یاریگای خۆیدا میوانداری ریال مەدرید بكات، لە میانی یارییەكانی گەڕی دووەمی قۆناخی خول – كۆمەڵەكانی چامپیۆنزلیگ.

پڕۆفایلی یاری

لە یەكەم یاری خۆیدا لە چامپیۆنزلیگ بە شێوازە نوێیەكەی ریال مەدرید میوانداری شتوتگارتی كرد و یارییەكەشی بە سێ گۆڵ بەرامبەر گۆڵێك لێ بردەوە.

كوڕانی كارلۆ ئانچێلۆتی وەرزی 2024/25یان بە بردنەوەی نازناوی سوپەری ئەوروپا دەستپێكرد، كاتێك توانیان لە ئاتاڵانتا ببەنەوە، لە لالیگاش بە كۆكردنەوەی 18 خاڵ لە ریزبەندی دووەم دێن و بە جیاوازی سێ خاڵ لە دوای بارسای پێشەنگەوەن.

ریال مەدرید لە لالیگادا بەگۆڵێك لەگەڵ مایۆركا، لاس پاڵماس و ئاتلێتیكۆ یەكسان بوو، لە یانەكانی ڤایادۆلید، ریال بێتیس ، ریال سۆسێداد ,  ئیسپانیۆل و ئالاڤێسی بردەوە.

لە بەرامبەردا لیل بە دۆران دەستیان بە یارییەكانی چامپیۆنزلیگ كرد و لە یەكەم یاریدا بە ئەنجامی دوو گۆڵی بێ وەڵام بە سپۆرتینگ دۆڕان.

لە لیگ وەن لە دوای تێپەڕبوونی شەش هەفتە بە كۆكردنەوەی دە خاڵ لە پلەی پێنجەم دێن.

پێشتر هیچ كات هەردوو یانە لە خولی یانە پاڵەوانەكانی ئەوروپا رووبەڕووی یەك نەبوونەتەوە.

هەواڵی پێكانی یاریزانەكان

لیل بە هۆكاری جیاواز ژمارەیەكی زۆر یاریزانی لەو یارییە بێ بەش دەبێت.

هەریەك لە یاریزانان ئانجڵ گۆمێس، هاكان هارالدسن، ساموێل ئۆمتیتی، نەبیل بن تاڵب، ئیسماعیلی و ئێنگاڵ موكاو بێ بەش دەبێت.

لە بەرامبەردا كیلیان ئێمباپێ زووتر لەوەی چاوەڕوان دەكرا چاكبووەتەوە و لەگەڵ یاریزانانی مەدرید گەشتی لیلی كردووە.

هەریەك لە یاریزانان تیبۆ كۆرتوا، براهیم دیاز، دانی سێبایۆس و دەیڤد ئالابا ناتوانن بەشداری یارییەكە بكەن.

پێکهاتەی پێشبینیکراوی لیل

چیڤالیێر

سانتۆس، دیاكیتێ، ئالیكساندرۆ، گودمونسن

ئاندرێ گۆمێس، ئاندرێ، كابێلا

ژیگروڤا، دەیڤد، ساهروی

پێکهاتەی پێشبینیکراوی ریال مەدرید

لونین

مێندی، رودیگەر، میلیتاو، كارڤاخال

كاماڤینگا، چوامێنی، ڤاڵڤێردی

بێڵینگهام

رۆدریگۆ، ڤینیسیۆس