پریڤیوی یاری ئارسیناڵ V پاریس سانجێرمان؛ دوا هەواڵ و پێكهاتەی پێشبینیكراو

یاریگا –

ئەمڕۆ گەڕێكی دیكەی خولی یانە پاڵەوانەكانی ئەوروپا بە شێوازە نوێیەكەی بەڕێوە دەچێت و چەند رووبەرووبوونەوەیەكی بەهێز دەبینین.

وا بڕیارە ئەمڕۆ سێشەممە كاتژمێر 22:00 بە كاتی كوردستان ئارسیناڵ لە یاریگای ئیماراتی تایبەت بە خۆی میوانداری پاریس سانجێرمان بكات، لە میانی یارییەكانی گەڕی دووەمی قۆناخی خول – كۆمەڵەكانی چامپیۆنزلیگ.

ئارسیناڵ لە یەكەم یاری خۆیدا بە شێوازە نوێیەكەی چامپیۆنزلیگ لە یاریگای ئاتڵانتا بە بێ گۆڵ یەكسان بوون.

پاریس سانجێرمانیش لە یەكەم یاریدا بە زەحمەت و بە تاكە گۆڵێك لە جیڕۆنایان بردەوە.

گەنەرز بە چوار بردنەوە بەرامبەر یانەكانی وۆڤز، ئاستۆن ڤیلا،تۆتنهام و لێستەر سیتی و دوو یەكسان بوون بەرامبەر برایتن و مانچێستەر سیتی وەرزی 2024/25یان دەستپێكردووە.

بە كۆكردنەوەی 14 خاڵ لە ریزبەندی سێیەمی پرێمەرلیگ دێن و بە جیاوازی یەك خاڵ لە دوای لیڤەرپوولی پێشەنگەوەن.

پاریس لە شەش هەفتەی لیگ وەندا لە پێنج یاری براوە بووە و یارییەكیش یەكسان بووە، لە یانەكانی مۆنپیێلیێ، لیل، برێست، رێن و لۆ هاڤەر بردووەتەوە و بەرامبەر رێمسیش یەكسان بووە.

هەردوو یانە پێشتر دوو جار رووبەڕووی یەك بوونەتەوە و هەردوو یارییەكەش بە یەكسان بوون كۆتایی هاتووە.

هەواڵی پێكانی یاریزانەكان

گەنەرز بە بێ مارتن ئۆدیگارد، ئالێكساندەر زێنچینكۆ، تۆمیاسو، كیران تێرنی و میكێل مێرینۆ رووبەرووی پاریس سانجێرمان دەبێتەوە.

لە بەرامبەردا پاریس بە بێ عوسمان دێمبێلی، گۆنچالۆ رامۆس، كێمبێپێ و لوكاس هێرناندێز بەرامبەر ئارسیناڵ یاری دەكات.

پێکهاتەی پێشبینیکراوی ئارسیناڵ

رایا

تیمبێر ، سالیبا، گابریێل، كالافیۆری

رایس، جۆرجینیۆ، هاڤێرتز

ساكا، ترۆسارد، مارتینێلی

پێکهاتەی پێشبینیکراوی پاریس سانجێرمان

دۆناروما

حەكیمی، ماركینیۆس، پاچۆ، مێندێس

ڤیتینیا، فابیان رویز، نێڤێس

باركۆلا، ئاسینسیۆ، دۆوی