یاریگا –
ئەمشەو لە كۆتا یاری هەفتەی هەشتەمی لالیگا و لە یاری لوتكەدا هەردوو یانەی ئاتلێتیكۆ مەدرید و ریال مەدرید رووبەڕووی یەك دەبنەوە.
وا بڕیارە ئەمڕۆ یەكشەممە كاتژمێر 22:00 بە كاتی كوردستان ئاتلێتیكۆ مەدرید لە یاریگای واندا میترۆپۆلیتانۆ میوانداری ریال مەدرید بكات، لە میانی یارییەكانی هەفتەی هەشتەمی لالیگای ئیسپانیا.
پڕۆفایلی یاری
هەردوو یانە لە ركابەرییەكانی ئەم وەرزەی لالیگا نەدۆڕاون، ئاتلێتیكۆ لە حەوت یاری پێشوودا خاوەنی چوار بردنەوە و سێ یەكسان بوونە و ریال مەدریدیش خاوەن پێنج بردنەوە و دوو یەكسان بوونە.
یانە شاهانەكە هەفتەی رابردوو بە سێ گۆڵ بەرامبەر دوو لە ئالاڤێسیان بردەوە و ژمارەی ئەو یارییانەی كە تووشی شكست نەهاتوون بۆ 39 یاری بەرزكردەوە.
كوڕانی كارلۆ ئانچێلۆتی وەرزی 2024/25یان بە بردنەوەی نازناوی سوپەری ئەوروپا دەستپێكرد، كاتێك توانیان لە ئاتاڵانتا ببەنەوە، لە لالیگاش بە كۆكردنەوەی 17 خاڵ لە ریزبەندی دووەم دێن و بە جیاوازی چوار خاڵ لە دوای بارسای پێشەنگەوەن.
ریال مەدرید لە لالیگادا بەگۆڵێك لەگەڵ مایۆركا و لاس پاڵماس یەكسان بوو، لە یانەكانی ڤایادۆلید، ریال بێتیس ، ریال سۆسێداد , ئیسپانیۆل و ئالاڤێسی بردەوە.
ئاتلێتیكۆ مەدریدیش لە یانەكانی جیرۆنا، ئاتلێتیك بلباو، ڤالێنسیا و سێلتا ڤیگۆی بردەوە و بەرامبەر یانەكانی ڤیاڕیال، ئیسپانیۆل و رایۆ ڤاییكانۆ یەكسان بوو.
هەواڵی پێكانی یاریزانەكان
ئاتلێتیكۆ مەدرید بە بێ سێ یاریزانی رووبەرووی ریال مەدریدی هاوشاری دەبێتەوە.
هەریەك لە یاریزانان سێزار ئازپیلیكویتا، پابلۆ باریۆس و تۆماس لێمار ناتوانن بەشداری دێربی مەدرید بەرامبەر ریال مەدرید بكەن.
لە بەرامبەردا ریال مەدرید لە تواناكانی كیلیان ئێمباپێ ئەستێرەی یانەكەی بێ بەش دەبێت.
جیا لە ئێمباپێ هەریەك لە یاریزانان براهیم دیاز، دەیڤد ئالابا ودانی سێبایۆس ناتوانن بەشداری یارییەكە بكەن.
پێکهاتەی پێشبینیکراوی ئاتلێتیكۆ مەدرید
ئۆبلاك
لی نۆرماند، خێمینیز، رێنێلدۆ
یۆرێنتی، دی پاوڵ، كۆكی، گالاگێر، لینۆ
گریزمان، ئالڤارێز
پێکهاتەی پێشبینیکراوی ریال مەدرید
كۆرتوا
مێندی، رودیگەر، میلیتاو، كارڤاخال
كاماڤینگا، چوامێنی، ڤاڵڤێردی
بێڵینگهام
رۆدریگۆ، ڤینیسیۆس
