یاریگا –
بارسێلۆنا دەیەوێت لە رێگەی رێککەوتنێکی نوێ لەگەڵ کۆمپانیای نایکی جارێکی دیکە بە یاسای 1:1 کار بکات.
رۆژنامەی موندۆ دیپۆرتیڤۆ بڵاویکردووەتەوە، بارسێلۆنا دەیەوێت لەماوەی 15 رۆژی داهاتوو لەگەڵ کۆمپانیای نایکی کێشەکانی چارەسەربکات و گرێبەستێکی نوێ لەگەڵ کۆمپانیاکە واژۆ بکات.
هەر بەگوێرەی زانیارییەکانی رۆژنامە ئیسپانییەکە، نوێنەرانی کۆمپانیا ئەمریکییەکە هەفتەی داهاتوو گەشتی بارسێلۆنا دەکەن، چاو بە دوایین وردەکارییەکانی گرێبەستەکەدا دەخشێننەوە و کۆتایی بە کارەکانی نوێکردنەوەی گرێبەستەکە دەهێنن و ناکۆکییەکانی نێوانیان چارەسەر دەکەن.
🔏 BARÇA x NIKE
🔵🔴 El Barça espera poder cerrar el acuerdo con Nike en 15 días
✍️ @ffpolo https://t.co/WP4Go8Oxdn
— Mundo Deportivo (@mundodeportivo) September 19, 2024
بۆچی پەیوەندیی نێوان بارسێلۆنا و نایکی تێکچوو؟
سەرەتا ئەمساڵ کۆمپانیای پوما بۆ کولوپەلی وەرزشی ئۆفەرێکی گرانبەهای پێشکەشی بارسێلۆنا کرد بۆ ئەوەی جێگای کۆمپانیای نایکی بگرێتەوە و ببێتە سپۆنسەری یانە کەتەلۆنییەکە، خوان لاپۆرتا سەرۆکی یانەی بارسێلۆنا بە ئاشکرا لە کۆنگرەیەکی رۆژنامەوانیدا رایگەیاند، گرێبەستەکەیان لەگەڵ نایکی هەڵدەوەشێننەوە.
دوای لێدوانەکانی لاپۆرتا، کۆمپانیا ئەمریکییەکە پەنای بردە بەر دادگا و کەیسەکەی لە بارسا بردەوە، ئێستا هەردوولا لە نوێکردنەوەی گرێبەستی نێوانیان نزیکن، کە لەوەتەی ساڵی 1998 نایکی سپۆنسەری بارسێلۆنایە.
بەگوێرەی گرێبەستە نوێیەکەیان بارسا ساڵانە 90 ملیۆن یۆرۆ وەردەگرێت و 150 ملیۆن یۆرۆش وەکو پاداشتی دارایی پێدەدرێت، کە سێ هێندەی جاران پارە لە نایکی وەردەگرێت. گرێبەستەکە بۆ ماوەی 10 ساڵ دەبێت و بەو هۆیەش دۆخی دارایی بارسێلۆنا هاوسەنگ دەبێتەوە و یانەکە لە یاسای دارایی خاوێنی لالیگا دەگەڕێتەوە سەر یاسای 1:1.
یاسای 1:1 چییە؟
بەگوێرەی یاسای 1:1 یانەکان لەبەرامبەر بەدەستهێنانی هەر یۆرۆیەک دەتوانن یۆرۆیەکی دیکە خەرج بکەن.
بەڵام بارسێلۆنا ئێستا بە یاسای 4:1 کار دەکات، کە لەبەرامبەر بەدەستهێنانی 4 یۆرۆ ئینجا بۆی هەیە یۆرۆیەک خەرج بکات.
یاسای 4:1 کێشەی گەورەی بۆ بارسێلۆنا دروستکردووە، چوونکە بۆ گواستنەوەی یاریزانێک پێویستی بە بەدەستهێنانی داهاتێکی زۆرە و دەبێت چوار هێندەی یانەیەکی دیکە داهات کۆبکاتەوە.
بارسێلۆنا دەیەوێت لە رێگەی رێککەوتنە نوێیەکەی لەگەڵ کۆمپانای نایکی جارێکی دیکە دۆخی دارایی ئاسایی بکاتەوە و لە وەرزی نوێوە بتوانێت بە یاسای 1:1 کار بکات.
نایکی دەبێتە فریادڕەسی بارسێلۆنا؟ یانە کەتەلۆنییەکە تەنیا یەک درێسی هەیە بۆ یاریکردن
