بۆچی ریال مەدرید چاودێری ناردبوو بۆ یارییەکەی تۆتنهام و ئارسیناڵ؟
یاریگا –
دێربی باکووری لەندەن هەر تەنها لەلایەن هاندەرانی ئارسیناڵ و تۆتنهامەوە گرنگی پێنەدراو، بەڵکوو ریاڵ مەدریدیش چاودێرێکی رژدی ئەو یارییەبوو.
هەردوو یانە لە هەفتەی چوارەمی پرێمەرلیگ رووبەڕووی یەکتربوونەوە و گەنەرز بە تاکە گۆڵێکی گابرێل دو سانتۆسی بەڕازیلیەوە شکستیان بە خاوەنماڵ هێنا.
بەگوێرەی سەرچاوەی باوەڕپێکراوی دیفێنسا سێنتراڵی ئیسپانی کە زۆرێک لە ناوەندەکانی دیکەی هەواڵیش بایەخیان پێدابوو، بۆ ئەو دێربیە ریاڵ چاودێر (دۆزەرەوە)ی خۆی ناردبوو بۆ هەڵسەنگاندنی هەریەکە لە ویلیام سالیبا لە ئارسیناڵ و کریستیان رۆمێرۆ لە تۆتنهام.
ئەو سەرچاوەیە ئاشکرایکردووە کە شاهانەکانی ئیسپانیا دەیانەوێ هاوینی داهاتوو لە یەکێک لەو دوو ئەستێرەی دڵی بەرگری بچنەپێشەوە.
🚨 Real Madrid will send a scout to today's North London derby as they consider moves for Arsenal's William Saliba and Tottenham's Cristian Romero next summer.
(Source: Defensa Central) pic.twitter.com/IlVwaUtR31
— Transfer News Live (@DeadlineDayLive) September 15, 2024
وا دیارە مەدرید لە ئێستاوە بیر لە شوێنگرەوە ئانتۆنی رودیگەر دەکاتەوە. ئەستێرە ئەڵمانییەکە دوو وەرزە هاوکارێکی گەورەی مێرەنگی دەکات لە بردنەوەی نازناوە جۆراوجۆرەکان، بەڵام هاوینی داهاتوو تەمەنی دەگاتە 32 ساڵ و بەوەش رۆمێرۆی ئەرجەنتینی 26 ساڵان و سالیبای 23 لە باشترین بژاردەکانن بۆیان.
