یاریگا –
پێش ئەوەی بلیتەکان بخرێنە بازاڕ، لە ئێستاوە لە بەغدا قەیرانی دەستکەوتنی بلیتی یارییەکەی کریستیانۆ رۆناڵدۆ دروستبووە، نرخی بلیتەکانی یارییەکە لە بازاڕی رەش بەرز بووەتەوە.
گەرچی وابڕیارە کاتژمێر 17:00 لە چوار شوێنی جیاواز لە بەغدا دەست بە فرۆشتنی بلیتەکانی یارییەکەی شوڕتە و نەسڕ بکرێت، بەڵام لە بەیانییەوە سەدان هاندەر چوونەتە خاڵەکانی فرۆشتنی بلیتەکانی یارییەکە و نۆرەیان گرتووە، بۆ ئەوەی بلیتی یارییە چاوەڕوانکراوەکەی کریستیانۆ رۆناڵدۆ لە بەغدا بکڕن.
یانەی شوڕتە رایگەیاندووە، لە چوار شوێنی جیاواز (یاریگای مەدینە، یاریگای شەعب، یاریگای شوڕتە، مەلەوانگەی فیردەوس) بلیتەکانی یارییەکەی نەسڕ دەفرۆشرێت، لە سەرلەبەیانییەوە هەزاران هاندەر لە شوێنەکانی فرۆشتنی بلیتەکان نۆرەیان گرتووە و چاوەڕێی دەستکەوتنی بلیتەکانی یارییەکە دەکەن.
بەفەرمی نرخی بلیتەکانی یارییەکەی شوڕتە و نەسڕ بە 10 هەزار دینار و 15 هەزار دینار و 25 هەزار دینار دیاریکراوە، بەڵام بەشێک لە هاندەران گلەیی ئەوە دەکەن لە دوێنێ شەوەوە لە بازاڕی رەش دەست بە فرۆشتنی بلیتەکان کراوە و نرخی بلیتەکان گەیشتووەتە زیاتر لە 150 هەزار دینار.
رۆژی دووشەممە شوڕتە لە خولی یانە بژاردەکانی ئاسیا لە بەغدا لە یاریگای مەدینە میوانداریی نەسڕ دەکات، کە یاریگاکە شوێنی 32 هەزار هاندەر دەگرێت.
