بارسێلۆنا فلیک یاخود میونشن باشترە؟

یاریگا –

ژمارەکانی هانزی فلیک لەگەڵ بارسێلۆنا جێگەی دڵخۆشی میدیاکانی کاتالوونیان.

رۆژنامەی موندۆ دێپۆرتیڤۆ لە ژمارەی ئەمڕۆیدا بەراوردی نێوان دەستپێکی فلیک لەگەڵ بارسا و بایرن میونشن کردووە. بارسێلۆنا چوار بردنەوەی بەدوای یەکی لەلالیگا لەژێر سەرپەرشتی فلیک بەدەستهێناوە.

لە رۆژنامەکەدا هاتووە، ئەمە بەهێزترین دەستپێکی فلیک نییە، بەڵکو هەمان دەستکەوتی لەگەڵ میونشنیش هەبووە. فلیک یەکەم یاری لەگەڵ میونشن لە چامپیۆنزلیگ بەرامبەر ئۆڵمپیاکۆس 2-0 بردەوە، دواتر لە بۆندسلیگا دوو یاری بەدوای یەک لە دۆرتموند و فۆرتونا دوسلدۆرفی 4-0 بردەوە، بردنەوەی چوارەمیش بەرامبەر رێد ستار بێلگراد بوو 6-0.

رۆبێرت لیڤاندۆڤسکی ئەوکات لە میونشن بوو، لەو چوار یارییەدا حەوت گۆڵی بۆ یانە باڤارییەکە کرد، بەڵام میونشنەکەی فلیک لە یاری پێنجەمدا 2-1 بەرامبەر بایەر لیڤەرکوزن دۆڕا و یاری شەشەمیشی بەرامبەر بۆڕووسیا مۆنشنگلادباخ 2-1 دۆڕاند.

فلیک لە هاوینی ئەمساڵدا، بووە شوێنگرەوەی چاڤی هێرناندێز و ئێستا تیمەکەی یەکەمی ریزبەندی لالیگایە.