کەی دەرگای گواستنەوەی هاوینەی یاریزانان لە خولە بەهێزەکان دادەخرێت؟

یاریگا –

لە خولە بەهێزەکانی ئەوروپا دوو رۆژ ماوە دەرگای گواستنەوەی هاوینەی یاریزانان دابخرێت، رۆژی هەینی لە هەر پێنج خولە بەهێزەکەی ئەوروپا دوایین وادەیە بۆ گواستنەوەی یاریزانان.

رۆژی هەینی بۆندسلیگا یەکەم خول دەبێت دەرگای گواستنەوەی یاریزانی نوێی تیا دادەخرێت، کاتژمێر 07:00ـی ئێوارە دوایین وادەیە، دوو کاتژمێر دواتر لە ئیتاڵیاش دەرگای گواستنەوەی یاریزانان بەڕووی یانەکانی سێریا ئەی دادەخرێت و کاتژمیر 09:00 دوایین وادەیە.

لە فەڕەنسا کاتژمێر 12:00ـی شەو دواوادەیە و نیوەشەو دەرگای گواستنەوەی یاریزانان بەڕووی یانەکانی لیگ1 دادەخرێت، یانەکانی پرێمەرلیگ و لالیگاش کاتژمیرێکی دیکەیان لەبەردەست دەبێت و کاتژمێر 01:00ـی شەو دەرگای گواستنەوەی یاریزانانیان دادەخرێت.

لە رۆشن لیگ دەرگای گواستنەوەی یاریزانان مانگێک زیاتر بە کراوەیی دەمێنێتەوە و یانەکانی سعوودیە تاوەکو رۆژی 6ـی ئۆکتۆبەر/تشرینی یەکەم دەتوانن گرێبەستی نوێ واژۆ بکەن.

یانەکانی پرێمەرلیگ لەم هاوینە تاوەکو ئێستا زۆرترین پارەیان لە کڕینی یاریزانان خەرجکردووە، دوو ملیار و 130 ملیۆن یۆرۆیان لە کڕینی یاریزانان خەرجکردووە و یانەکانی سێریا ئەیش لە پلەی دووەم دێن و زیاتر لە 818 ملیۆن یۆرۆیان خەرجکردووە.

یانەکانی خولی فەڕەنسی 677 ملیۆن یۆرۆیان لەم هاوینە خەرجکردووە، یانەکانی بۆندسلیگا 568 ملیۆن یۆرۆیان خەرجکردووە و یانەکانی لالیگاش لەم هاوینە تەنیا 524 ملیۆن یۆرۆیان لە کڕینی یاریزانان خەرجکردووە. یانەکانی سعوودیەش بەراورد بە هاوینی رابردوو ئەم هاوینە رەزیلترن و تا ئێستا 231 ملیۆن یۆرۆیان خەرجکردووە.