ئارسێناڵ گواستنەوەی یاریزانێکی ئیسپانی بۆ ریزەکانی راگەیاند
گەنەرز پاڵەوانێکی ئەوروپای گواستەوە
یاریگا –
ئارسێناڵ بەفەرمی گرێبەستی میکێل مێرینۆ ناوەڕاستکاری ئیسپانی لە یانەی ریال سۆسیدادەوە بۆ ریزەکانی راگەیاند.
میکێل مێرینۆ ناوەڕاستکاری ئیسپانی بەرامبەر 32 ملیۆن یۆرۆ و 5 ملیۆن یۆرۆی دیکەش بەگوێرەی دەستکەوتەکانی پەیوەندی بە ریزەکانی ئارسێناڵی ئینگلیزییەوە کرد و لەو یانەیە درێسی ژمارە 32 دەپۆشێت.
Ready to achieve big things – together ❤️
Welcome to The Arsenal, Mikel Merino 🇪🇸 pic.twitter.com/WhbHXMaV1p
— Arsenal (@Arsenal) August 27, 2024
ئارسێناڵ بە ڤیدیۆیەک گرێبەستی مێرینۆی راگەیاندووە، کە میکێل ئارتێتا راهێنەری یانەکە بەخێرهاتنی هاونیشتیمانەکەی دەکات.
میکێل مێرینۆ پشکنینی پزیشکی بە سەرکەوتوویی تێپەڕاند و بۆ ماوەی چوار ساڵ بووە یاریزانی نوێی ئارسیناڵ.
هەفتەی رابردوو، ئارسیناڵ و ریال سۆسیداد لەسەر گواستنەوەی مێرینۆ بەبڕی 28.4 ملیۆن پاوەند رێککەوتن و مێرینۆ ناوی لە لیستی یاریزانانی ریال سۆسیداد بۆ یاریی رابردوویان بەرامبەر ئیسپانیۆل نەبوو.
هەینیی رابردوو، مێرینۆ ماڵئاوایی لە هاوتیمەکانی لە سۆسیداد کرد و دەبێتە دووەم یاریزان لەم هاوینە پەیوەندی بە ریزەکانی ئارسێناڵ بکات، لە دوای گواستنەوەی ریکاردۆ کالافیۆری و گۆڕینی گرێبەستی دەیڤد رایا لە خواستنەوە بۆ هەمیشەیی.
لە ماوەی شەش وەرزی رابردوودا، مێرینۆ 27 گۆڵی لە 242 یاریدا بۆ سۆسیداد کردووە، لە وەرزی 2019-20 بووە پاڵەوانی جامی شای ئیسپانیا و وەرزی رابردوو لەگەڵ تیمەکەی گەیشتە قۆناخی 16ی چامپیۆنزلیگ.
مێرینۆ 28 یاری نێودەوڵەتی لەگەڵ هەڵبژاردەی ئیسپانیا هەیە و بەشداری لە هەر حەوت یارییەکەی ئیسپانیا لە یۆرۆی 2024دا کرد.
