جەیمس رۆدریگێز دەگەڕێتەوە لالیگا
یاریگا –
جەیمس رۆدریگێزی کۆڵۆمبی جارێکی دیکە بۆ یاریکردن دەگەڕێتەوە ئیسپانیا.
رۆژنامەی ئاس بڵاویکردووەتەوە، یانەی رایۆ ڤایکانۆی ئیسپانی لە گواستنەوەی جەیمس رۆدریگێز نزیکبووەتەوە و یانەکە خەون بە گواستنەوەی ئەستێرە کۆڵۆمبییەکە دەبینێت.
بەگوێرەی رۆژنامە ئیسپانییەکە ئێستا جەیمس لە مەدریدە، لەوێ خانویەکی هەیە و چاوەڕوانی یەکلایی بوونەوەی چارەنووسی دەکات.
⚡ De los creadores de “¿Falcao al Rayo? Imposible” llega…
🇨🇴 Y es cierto que está difícil, sobre todo desde el punto de vista económico, pero contactos ha habido. Quién sabe…
Lo que sabemos: https://t.co/LOln9huO49 pic.twitter.com/H7dELMn6Ec
— Diario AS (@diarioas) August 22, 2024
تاکە بەربەست لەبەردەم یانە مەدریدییەکە گرفتی داراییە، بەڵام یانەکە سپۆنسەری نوێی پەیداکردووە و هەوڵدەدات لەم هەفتەیە گرێبەستەکەی جەیمس واژۆ بکات.
یاریزانە تەمەن 33 ساڵانییەکە لە کۆپا ئەمێریکای 2024 ئاستێکی بەرزی پێشکەشکرد، بۆ گەیشتن بە یاریی کۆتایی پاڵەوانێتییەکە سەرکردایەتی هەڵبژاردەی کۆڵۆمبیای کرد. بوو بە تاکە یاریزان لەمێژوودا لە وەشانێکی کۆپا شەش گۆڵ دروستبکات، لە چوار یاریی جیاواز خەڵاتی باشترین یاریزانی بەدەستهێنا و بە باشترین یاریزانی پاڵەوانێتییەکەش دەستنیشانکرا.
جەیمس یاریی بۆ یانەکانی بانفیڵدی ئەرجەنتینی، پۆرتۆی پۆرتوگالی، مۆناکۆی فەرەنسی، ریال مەدریدی ئیسپانی، بایرن میونشنی ئەڵمانی، ئێڤەرتنی ئینگلیزی، رەیانی قەتەری ئۆڵیمپیاکۆسی یۆنانی، ساو پاوڵۆی بەرازیلی کردووە. لە 475 یاریی 122 گۆڵی کردووە و 150 گۆڵی دروستکردووە.
بە درێسی هەڵبژاردەی وڵاتەکەشی بەشداری 106 یاریی کردووە، 28 گۆڵی کردووە و 33 گۆڵیشی دروستکردووە.
دوو نازناوی چامپیۆنزلیگ، دوو نازناوی جامی جیهانی یانەکان، دوو نازناوی لالیگا، دوو نازناوی بۆندسلیگا، دوو نازناوی سوپەری ئەوروپا، دوو نازناوی سوپەری ئەڵمانیا، نازناوێکی یۆرۆپالیگ، نازناوێکی جامی ئەڵمانیا، نازناوێکی جامی سوپەری ئیسپانیا، نازناوێکی خولی ئەرجەنتینی، نازناوێکی جامی پۆرتوگال، نازناوێکی جامی بەرازیل و سێ نازناوی جامی سوپەری پۆرتوگالی بەدەستهێناوە.
