گێنیس سپۆرت ئەو کۆمپانیا تەکنەلۆژیەیە کە خاوەنی ئەم پڕۆژە نوێیەی پرێمەرلیگە، ئەم کۆمپانیایە ناوی لەم سیستەمە ناوە دراگۆن یان ئەژدیها، دەیەوێت لە رێگای بەکارهێنانی کامێراکانی ئایفۆن 14 بە پشتبەستن بە ژیری دەستکرد بڕیارەکانی سیستەمی ڤار و ناوبژیوانان لەبارەی ئۆفساید وردتر و خێراتر بکات.
بەگوێرەی پێشبینییەکان، سیستەمی دراگۆن بە پشتبەستن بە ئایفۆن 14 لە هەر بڕیارێکی ڤار نزیکەی 30 چرکە خێراتر بڕیار دەدات، کە لەم چەند وەرزەی رابردوو هاندەران و یانەکانی پرێمەرلیگ گلەییان لە درەنگ بڕیاردانی ڤار هەیە.
بەگوێرەی ئەم سیستەمە، هەر یاریزانێک نزیکەی 7 بۆ 10 هەزار خاڵی جەستەی تۆمار دەکرێت و چاودێری دەکرێت، لە هەر چرکەیەکدا ئەم سیستەمە دەتوانێت 100 فرەیم تۆمار بکات، ئەمەش وادەکات لەکاتی یەکلاکردنەوەی حاڵەتەکانی ئۆفساید، بە پشتبەستن بە زیرەکی دەستکرد خێراتر و وردتر بڕیار بدرێت.
لە هەر لایەکەی یاریگا بەهۆی راگرێکەوە مۆبایلەکان جێگیر دەکرێن کە باران لێیان نەدات و دەتوانرێت چوار مۆبایل بە هەر راگرێکەوە ببەسترێت، لە رێگای مۆبایلەکانەوە بە خێراترین ماوە چاودێری جولەی تۆپ و جەستەی یاریزانەکان دەکرێت.
ئەم کۆمپانیایەی پرێمەرلیگ پەنای بۆ بردووە، لەوەتەی ساڵی 2018 لە ئێن بی ئەی کار دەکات، بۆیە یانەکانی پرێمەرلیگ هیوادارن ئەم ئەژدیهایە کۆتایی بە گلەیی و گازاندەکانیان بهێنێت، کە ئەمساڵ یانەکانی پرێمەرلیگ جگە لە وۆلڤەرهامتن بە کۆی دەنگ بڕیاریان لەسەر بەردەوامبوونی سیستەمی ڤار دا، بەڵام داوایان کرد سیستەمەکە خێراتر و وردتر بکرێت.
